“Миллий тикланиш” демократик партияси Марказий кенгашида ЕХҲТ Демократик институтлар ва инсон ҳуқуқлари бўйича бюросининг Сайлов департаменти вакиллари билан учрашув бўлиб ўтди.

Партия Марказий кенгаши раиси ўринбосари Феруза Муҳаммеджонова меҳмонларни “Миллий тикланиш”нинг сайловлардан кейинги фаолияти билан таништириб, партия конституциявий ислоҳотлар ташаббускорларидан бири сифатида мамлакат сиёсий майдонида “Қадриятларга таянган тараққиёт” ғояси асосида фаол ҳаракат қилаётганини таъкидлади.

– Партия жамиятнинг сиёсий катализатори эканидан келиб чиқиб, партиямиз қошида илк бор “Ақл маркази” ташкил этилди. Марказ депутатлар фаолиятини баҳолаш бўйича рейтинг индикаторлари ишлаб чиқиш юзасидан илк тадқиқот олиб борилмоқда. Мақсад – депутатлик корпуси фаолиятини янги босқичга кўтариш ҳамда давлат ва халқ ўртасида ишончли кўприк бўлиш, –деди Ф.Муҳаммеджонова.

ЕХҲТнинг Сайлов департаменти бошлиғи ўринбосари Улви Ахундлу “Миллий тикланиш” ўз мақсад-вазифаларидан келиб чиқиб, кўплаб амалий ташаббуслар билан чиқаётгани эътирофга лойиқлигини ва бу партиянинг жамият ҳаётидаги бевосита иштироки ва таъсиридан далолат эканини таъкидлади. Шунингдек, сиёсий жараёнларга халқаро андозалар асосида ёндашиш борасида ўз фикр ва мулоҳазаларини билдирди.

Мулоқотда томонлар ўзларини қизиқтирган бир қатор масалаларда ҳам фикр алмашдилар.

М. Комилова, ЎзА