Дунёга машҳур “Аватар” узумлари энди Андижонда (+видео)
Андижон вилояти Асака туманининг “Соҳибкор ва Янгиҳаёт” массивларида 190 гектар майдондаги қир-адирлик ва яйлов ерларини ўзлаштириб, токзорлар ташкил этиш режалаштирилган бўлиб, ҳозирда 110 гектар майдонга узумнинг “Аватар” навли кўчатлари экилди.
Шунингдек, сув таъминоти оғир бўлган ҳудудда тўлиқ томчилатиб суғориш тизими жорий қилиниб, қатор ораларига полиз ва сабзавот экинлари парвариш қилинмоқда. Қолган 80 гектар майдонга жорий йилнинг куз ойларида кўчат экиш ишлари амалга оширилади.
Мазкур лойиҳа Агросаноатни ривожлантириш агентлиги ҳузуридаги “Агросаноат инноваторлари” МЧЖ кўмагида амалга оширилмоқда.
Айнан ҳудуднинг ноёб иқлим шароити, ер майдонлари узумнинг “Аватар” (Мон дропс) навига мос келди. Ушбу навнинг ватани Калифорния бўлиб, ушбу кўчатлар қурғоқчиликка чидамли ҳисобланади.
Ушбу боғ Калифорния тажрибаси асосида яратилган бўлиб, узум етиштиришда юқори самарадорликка эришиш, ресурслардан оқилона фойдаланиш ҳамда маҳсулот сифатини ошириш имконини бермоқда.
Шу билан бирга мазкур лойиҳа орқали ушбу жойни минтақавий туристик ҳудудга айлантириш, мингга яқин иш ўринлари яратиш, бюджетга 3 млрд сўмлик тушум ва 5 млн долларлик хизматлар экспортини таъминлаш режа қилинган.
Бу ерда 4 та капсула усулида барпо этилган дам олиш маскани ва 5 та замонавий жиҳозланган ўтов типидаги меҳмон уйлари, агротуризм мажмуаси, гуллар боғи, арчазор, 30 гектардан иборат манзарали дарахтзорлар ва 1 та оилавий ресторан ташкил қилинади. Шунингдек, Зиплайн - 2 км узунликда дор йўли ва турли хил аттракционлар дам олувчиларга хизмат кўрсатади. Лойиҳа 2026 йилда тўлиқ қувватда ишга туширилади.
<iframe width="560" height="315" src="https://www.youtube.com/embed/pdrkbvXH_iE?si=7KBPAlUxpxkXK6AR" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов,
Улуғбек Тўхтаев, ЎзА
