Дубайда олтин йўлакча — савдо ва туризм уйғунлиги
Жорий йилниг якунига қадар “Dubai Gold District” савдо даҳасида дунёдаги биринчи олтин йўлакча фойдаланишга топширилади.
Лойиҳа ташкилотчиларининг қайд этишича, ушбу диққатга сазовор иншоот ҳудуднинг сайёҳлик салоҳиятини ошириш, шунингдек, Дубай шаҳрининг олтин савдоси бўйича глобал марказ сифатидаги мавқеини мустаҳкамлашга қаратилган, дейилади “Naked science” нашрининг лойиҳа ташаббускорлари нутқига асосланган хабарида.
“Ithra Dubai” компанияси томонидан ишлаб чиқилган меъморий ва туризм лойиҳаси бўлган кўча йирик заргарлик марказининг бир қисми сифатида лойиҳалаштирилган ва олтин элементлар билан қопланган. Йўлак аҳоли ва сайёҳларга олтин йўл бўйлаб сайр қилиб савдо қилиш имконини беради.
Ҳозирча йўлакчанинг аниқ узунлиги, қурилишда ишлатиладиган олтин миқдори ва қоплама технологияси тўлиқ ошкор этилмаган. Шу сабабли унинг бутун юзаси соф олтиндан тайёрланадими ёки олтин махсус конструкция ва безакларда қўлланиладими, деган саволлар очиқ қолмоқда.
Шу билан бирга, ҳудуд инфратузилмасини кенгайтириш, янги офис ва савдо майдонларини ташкил этиш ҳамда олтин ва заргарлик савдосига ихтисослашган компанияларни жалб қилиш ишлари давом этмоқда. 2026 йил бошидан буён улгуржи олтин савдоси билан шуғулланувчи офислар сони 20 фоизга, олтин, заргарлик буюмлари, қимматбаҳо тошлар ва қимматбаҳо соатлар сотувига ихтисослашган янги дўконлар сони эса 15 фоизга ошгани маълум қилинган.
“Dubai Gold District” тижорат йўналиши расмий вакилининг маълум қилишича, янги йўлакча дунёдаги илк ва энг узун олтин йўлакча бўлиши кутилмоқда. Лойиҳа маҳаллий аҳоли ва хорижий сайёҳларга олтин билан боғлиқ ўзига хос таассурот тақдим этиши, шунингдек, олтинни оддий савдо маҳсулотидан сайёҳлик тажрибасининг бир қисмига айлантиришга қаратилган. Агар лойиҳа белгиланган муддатда амалга ошса, “Gold Street” шаҳарнинг халқаро миқёсдаги мавқеини мустаҳкамлашдаги янги масканлардан бирига айланади.
Зуҳра Мирзабоева,
ЎзА
