Тармоқларда пойтахтимиздаги Содиқ Азимов кўчасида жойлашган "Тесто" ресторанлар тармоғи ҳамтаъсисчиси Замира Раҳмонованинг мурожаати эълон қилинди.
У мурожаатида корхонасининг электр таъминотидан узилгани натижасида катта иқтисодий зарар кўрганини маълум қилди. Раҳмонова масъулларни тизимли ёндашув, очиқ мулоқот ва ўзаро ҳурматга чақирди. Шундан сўнг, ЎзЛиДеП вакиллари тадбиркор билан учрашди.
Олий Мажлис Қонунчилик палатаси депутати Абдуманноб Бўриев воқеа жойига бориб, вазиятни ўрганди, деб хабар берди ЎзЛиДеП матбуот хизмати.
Қайд этилишича, ўрганиш жараёнида тадбиркор туризм кўчасини қуриш доирасида амалга оширилаётган қурилиш ва таъмирлаш ишлари тадбиркорлар билан маслаҳатлашилмай олиб борилаётганини таъкидлаган.
– Ҳокимият томонидан тавсия этилган фасад бизга мос келмайди, – деган тадбиркор. – Биз ресторанимизни ўзимизга мос келадиган дизайнда ишлаб чиқишни хоҳладик. Натижада корхонамиз электр таъминотидан узиб қўйилди. Орқамизда ҳеч кимимиз йўқлиги учун ижтимоий тармоқлар орқали мурожаат қилишга мажбур бўлдик.
Депутат Бўриев тадбиркорнинг орқасида Президентимиз турганини ва ЎзЛиДеП ҳар доим тадбиркорларни қўллаб-қувватлашга тайёрлигини таъкидлаган. У, шунингдек, "салласини деса, калласини олиб келадиган" ижрочилар ҳали ҳам борлигини ачиниш билан қайд этган.
Сўнг депутат ресторан электр таъминотидан узилгани оқибатида етказилган зарар миқдори билан қизиққан.
– Электр узилишидан нафақат биз, балки ёнимиздаги корхоналар ҳам зиён кўрди, – деган З.Раҳмонова. – Аммо зарар миқдорини далолатнома қилмадик. Ўзимиз учун яна бир катта муаммони яратгимиз келмади. Чунки бу ресторанда 70 одам ишлайди. Агар брендимиз ёпилиб кетса, 70 одамнинг ҳаёти ҳам издан чиқиши мумкин. Шу боис юристлар томонидан билдирилган таклифларни рад этдик. Чунки биз электр таъминотига ўхшаган идоралар учун кичкина одамлармиз.
Депутат Бўриев агар тадбиркорлар дардини айтишдан қўрқаверса, муаммолар ҳал бўлмаслигини, шу сабабли муаммони ечиш учун жасорат билан ҳаракат қилиш кераклигини таъкидлаган.
Мулоқот якунида депутат бу масала шахсан унинг назоратида бўлишини, ноҳақлик қилган шахслар қонун олдида жавоб беришини ва тадбиркорлар хавотирга тушмасликлари кераклигини айтган. У, шунингдек:
— Агар электр таъминоти корхонасини судга берсангиз, ёнингизда туриб сизни ҳимоя қиламан, — деб ваъда берган.
ЎзА