Бухорода меҳнат ярмаркаси: 10 мингдан ортиқ имконият

Инсон учун иш – шунчаки маош олиш воситаси эмас. Унинг ортида оиланинг хотиржамлиги, фарзандлар келажаги, ўз қобилиятини намоён этиш истаги, жамиятда ўз ўрнини топиш ва муносиб ҳаёт кечириш орзуси мужассам.

Шу боис бугун аҳоли бандлигини таъминлаш, ҳар бир фуқаронинг меҳнат қилиш ва даромад топиш имкониятини кенгайтириш давлат сиёсатидаги муҳим вазифалардан бирига айланмоқда. Давлат раҳбари Шавкат Мирзиёев томонидан ҳам аҳолини даромадли меҳнат билан таъминлаш, маҳаллаларда иқтисодий имкониятларни кенгайтириш, тадбиркорликни қўллаб-қувватлаш ва янги иш ўринлари яратиш масалаларига алоҳида эътибор қаратилмоқда. Жумладан, 2026 йил 3 сентябрдаги видеоселектор йиғилишида камбағалликни қисқартириш ва аҳоли даромадларини ошириш ишларини ҳар бир оила ва маҳалла кесимида манзилли ташкил этиш вазифалари белгиланди.

Бухоро вилоятида ташкил этилган навбатдаги меҳнат ярмаркаси ана шу эзгу мақсадларнинг ҳаётдаги амалий ифодаларидан бири бўлди.

Бухоро вилояти ҳокимлиги ташаббуси билан Сомонийлар истироҳат боғида ташкил этилган бўш иш ўринлари меҳнат ярмаркасида иш изловчилар учун кенг имкониятлар яратилди.

Тадбирда вилоят ҳокими Ботир Зарипов ҳам иштирок этиб, ярмаркада яратилган шароитлар, иш берувчилар томонидан тақдим этилган бўш иш ўринлари ва аҳолига таклиф этилаётган имкониятлар билан танишди.

Вилоят раҳбари иш излаб келган фуқаролар, корхона ва ташкилотлар, тадбиркорлик субъектлари ҳамда масъуллар билан бевосита мулоқот қилди. Бу мулоқотларда нафақат иш ўринлари, балки меҳнат бозорида қайси касб ва мутахассисликларга талаб юқори экани, иш берувчиларнинг эҳтиёжи ва аҳолининг бандлигини таъминлаш масалалари муҳокама қилинди.

Ярмаркада вилоятда фаолият юритаётган 495 та давлат ва нодавлат ташкилоти, йирик ва ўрта тадбиркорлик субъекти иштирок этиб, фуқароларга жами 10 745 та бўш иш ўрни таклиф қилди.

Бир қарашда оддий рақамдек кўринади. Аммо ҳар бир иш ўрни ортида муайян инсон тақдири бор. Бу ўз касби бўйича иш топишни истаган мутахассис, биринчи марта меҳнат бозорига қадам қўяётган ёш, оиласига даромад келтиришни мақсад қилган фуқаро ёки янги йўналишда ўзини синаб кўрмоқчи бўлган инсон учун янги имконият демакдир.

Меҳнат ярмаркасининг энг муҳим жиҳатларидан бири иш изловчилар билан иш берувчиларнинг бевосита учрашиши бўлди. Фуқаролар ўз маълумоти, касб-ҳунари, иш тажрибаси ва қизиқишларига мос бўлган бўш иш ўринлари ҳақида тўғридан-тўғри иш берувчилардан маълумот олди. Иш вақти қандай? Маош миқдори қанча? Меҳнат шароити қандай? Лавозим вазифалари нималардан иборат? Ишга қабул қилиш тартиби қандай? Ярмаркада ана шу саволларнинг барчасига бевосита иш берувчилардан жавоб олиш имконияти яратилди. Бу эса иш изловчи инсон учун муҳим. Чунки иш топишнинг ўзи эмас, балки муносиб, барқарор ва қонуний меҳнат ўрнига эга бўлиш муҳим.

Бугунги меҳнат бозорида инсондан фақат ишлаш истаги эмас, балки муайян касбий кўникма, ташаббускорлик ва молиявий саводхонлик ҳам талаб этилади. Шу маънода мазкур ярмарка фақат бўш иш ўринлари кўргазмаси бўлиб қолмади.

Тадбирда банк муассасалари вакиллари ҳам иштирок этиб, аҳолига кредит маҳсулотлари ва молиявий хизматлар ҳақида маълумот берди. Тадбиркорлик фаолиятини бошлаш ёки кенгайтириш, ўзини ўзи банд қилиш, янги даромад манбаини яратиш истагида бўлган фуқароларга кредит маблағларидан фойдаланиш имкониятлари тушунтирилди.

Кредит олиш шартлари, талаб этиладиган ҳужжатлар, маблағ ажратиш тартиби ва тўлов шартлари бўйича саволларга жавоб берилди.

Айниқса, фуқароларга кредит маблағини олишнинг ўзи эмас, балки уни тўғри мақсадга йўналтириш, молиявий мажбуриятларга масъулият билан ёндашиш ва мавжуд имкониятлардан самарали фойдаланиш муҳимлиги тушунтирилди.

Бу жиҳат давлат раҳбарининг тадбиркорликни ривожлантириш, одамларни ўз маҳалласида даромадли қилиш ва янги иш ўринларини кўпайтиришга қаратилган ташаббуслари билан ҳамоҳангдир. Президент 2026 йил август ойида тадбиркорлар билан очиқ мулоқотда янги иш ўринларини кўпайтириш ва одамларни маҳалласининг ўзида даромадли қилиш мақсадини алоҳида таъкидлаган эди.

Ярмарканинг яна бир муҳим жиҳати фуқароларга касбий йўналиш бериш масаласига эътибор қаратилганидир. Чунки замонавий меҳнат бозорида “ҳар қандай иш бўлса бўлди” деган ёндашув тобора ўз аҳамиятини йўқотмоқда.

Бугун инсон ўз қобилияти ва қизиқишига мос касбни танлаши, меҳнат бозорида талаб юқори бўлган йўналишларни билиши, зарур кўникмаларни эгаллаши ва ўз малакасини мунтазам ошириб бориши зарур. Ярмарка ана шу нуқтаи назардан ҳам аҳамиятли бўлди. Иш изловчиларга мавжуд касб ва мутахассисликлар, иш берувчиларнинг эҳтиёжлари ҳамда меҳнат бозоридаги имкониятлар ҳақида маълумот берилди.

Тадбир доирасида аҳолининг ҳуқуқий саводхонлигини оширишга ҳам алоҳида эътибор қаратилди. Фуқароларга меҳнат ҳуқуқлари, меҳнат шартномасини тузиш тартиби, хавфсиз меҳнат шароитлари, иш берувчи ва ходим ўртасидаги муносабатларда қонунчилик талабларига риоя қилиш бўйича тушунтиришлар берилди.

Зеро, ишга жойлашишнинг ўзи етарли эмас. Инсон ўз ҳуқуқини билиши, меҳнат шартномасининг мазмун-моҳиятини англаши ва қонуний манфаатларини ҳимоя қила олиши ҳам муҳим. Шунингдек, тадбир иштирокчиларига хавфсиз меҳнат миграцияси, хорижда ишлашда эътибор қаратиш лозим бўлган жиҳатлар, одам савдосининг хавф-хатарлари ва ундан ҳимояланиш механизмлари ҳақида ҳуқуқий маълумотлар тақдим этилди.

Бу, айниқса, хорижга ишлаш учун чиқишни режалаштираётган фуқаролар учун муҳим огоҳлантиришдир.

Меҳнат ярмаркасининг аҳамиятини фақат ишсиз фуқаролар нуқтаи назаридан баҳолаб бўлмайди. Бундай тадбирлар иш берувчилар учун ҳам ўзига хос очиқ мулоқот майдонидир.

Корхона ва ташкилотлар ўзларида мавжуд бўш иш ўринларини таклиф этиш, зарур мутахассисларни излаш, ишга қабул қилиш шартларини тушунтириш ва меҳнат бозоридаги эҳтиёжларини билдириш имкониятига эга бўлди. Шу тариқа бир майдонда икки томон – иш изловчи ва иш берувчи учрашди. Бир томонда меҳнат қилишга тайёр инсон. Иккинчи томонда эса ўз жамоаси учун малакали кадр излаётган корхона. Уларни бир нуқтада учраштиришнинг ўзи ҳам бандликни таъминлаш йўлида муҳим қадамдир.

Бугун мамлакатимизда бандлик масаласига янгича ёндашув шаклланмоқда. Аҳолини иш билан таъминлаш фақат статистик кўрсаткич эмас, балки ҳар бир оиланинг даромади, фаровонлиги ва келажаги билан боғлиқ масала сифатида қаралмоқда. Давлат раҳбари томонидан ҳам камбағалликни қисқартириш, аҳоли даромадларини ошириш ва ҳар бир оила билан манзилли ишлаш тизимини кучайтириш вазифалари белгилаб берилмоқда.

Бухородаги меҳнат ярмаркаси ҳам ана шу сиёсатнинг ҳудуддаги амалий кўринишларидан бири сифатида аҳамиятли. 495 та ташкилот, 10 745 та бўш иш ўрни, минглаб инсонлар учун янги танлов ва янги имкониятлар. Энг муҳими, бу рақамлар қоғозда қолиб кетмаслиги керак.

Ҳар бир бўш иш ўрни ҳақиқий бандликка айланса, ҳар бир иш изловчи ўз қобилиятига мос иш топса, ҳар бир тадбиркор янги иш ўрни ярата олса – ана шунда меҳнат ярмаркасининг ҳақиқий самараси намоён бўлади.

Зеро, инсонни ишли қилиш унинг қўлига фақат маош олиш имкониятини эмас, ўз келажагини ўзи қуриш имкониятини беришдир.

Сомонийлар истироҳат боғидаги бугунги ярмарка ҳам ана шу эзгу мақсадга хизмат қилди: иш излаган инсонга – имконият, иш берувчига – муносиб кадр, тадбиркорга – янги қадам, оилага эса – барқарор даромад сари йўл очди.

Зариф Комилов, ЎзА мухбири