Бухоро вилоятида содир бўлган ҳолат бартараф этилди
Ижтимоий тармоқларда Бухоро вилояти Ромитан тумани Газли шаҳарчасига яқин ҳудудда ёнғин бўлаётгани ҳақида хабар тарқалди.
Бухоро вилояти Фавқулодда вазиятлар бошқармасидан олинган хабарга кўра, бугун 10 февраль куни соат 11:26 да “Газли” магистрал газ қазиш бошқармасининг диаметри 1020 мм бўлган 26 кг босим остидаги “Бухоро-Урал” МГҚнинг ер остидан ўтган 106 км.да (энг яқин аҳоли маскани Ромитан тумани “Қизил работ” маҳалла фуқаролар йиғинидан 40 км узоқликда) авария содир бўлган.
Олиб борилган тезкор ҳаракатлар натижасида соат 11:30 мурувватлари ёпилиб, қолдиқ газларни чиқиб кетиши кузатилган. Ҳозирда авария тўлиқ бартараф этилган. Воқеа жойига вилоят ФВБ, Ромитан тумани ФВБ бошлиғи 1 та ёнғин-қутқарув экипажи етиб борган.
Ҳодиса оқибатида тан жароҳати олган ва ҳалок бўлганлар йўқ.
Зариф Комилов, ЎзА мухбири