Жиззах вилоятида бу йил 290 минг 680 тонна пахта йиғиб олиш мўлжалланган бўлиб, бугунги кунда йиллик режа 70 фоизга бажарилди. Ҳар куни режадан 3,5 фоиздан кўпроқ пахта терилмоқда.

Дўстлик туманидаги 12 минг 800 гектар пахта майдонларидан 57 минг 500 тонна ҳосил олиш кўзда тутилган. 375 та пахтачилик хўжалиги терим жараёнига фаол киришган. Улар орасида “Эшбек ота” фермер хўжалиги барчага ибрат бўлмоқда.

– Фермер хўжалигимиз 1998 йилда ташкил топган. Шундан буён унга раҳбарлик қилиб келаман, – дейди “Эшбек ота” фермер хўжалиги раиси Шерали Эшбеков. – Илгарилари ҳар гектардан 35-40 центнер ҳосил олганмиз. Аммо бу йил  ҳосил 65–70 центнердан ошмоқда. Рости, бунақа ҳосилни илгари ҳеч кўрмаганман. Хитойнинг 4 қаторли “Boshiran 4MZ-4A” русумдаги пахта териш комбайни бор. Бир кунда 30–35 тоннагача ҳосил териб оляпти. Унумдорлик ҳақиқатан ҳам ҳайратланарли.

Айни пайтда туманда 40 дан ортиқ пахта териш машиналари икки сменада ишламоқда.  Механизаторлар учун даланинг ўзида иссиқ овқат ва дам олиш шароитлари яратилган. 150 та ташиш техникаси ва 600 га яқин тиркама ёрдамида йиғилган ҳосил ўз вақтида қабул пунктига етказиб берилаётир.

<iframe width="640" height="420" src="https://www.youtube.com/embed/YKGtsABA2VE" title="Bu yil unumdorlik hayratlanarli darajada" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Абдужалол Қаюмов (сурат, видео), ЎзА