Япония парламенти мамлакат Либерал-демократик партияси раиси Санаэ Такаитини мамлакат бош вазири этиб тасдиқлади. У кунчиқар юрт тарихидаги ушбу лавозимни эгаллаган биринчи аёл бўлди, деб хабар тарқатди “BBC” сайти.

Такаити ўта консерватив қарашлари билан танилган сиёсатчи. Шунинг учун баъзи нашрлар “япон империализми бош кўтармоқда, унинг юзи эса аёлники”, деб ёзишди. 

Санаэ Такаити ким?

У 1961 йили Японияда дунёга келган. Отаси автомобиль заводида ишчи, онаси эса полиция офицери бўлган. Такаити Коба университетини тугатган. 1987 йили АҚШга малака оширишга кетади ва икки йил давомида демократлар партиясида фаолият юритади. Японияга қайтгач, ТВда ўзини бошловчи сифатида синаб кўради ва баъзи кўрсатувларга чиқиб омма эътиборига тушади. 

Ҳозир уни кўпчилик ёш пайтларида ўз қизиқишларига эрк берган шаддод қиз образида тасаввур қилолмайди. Мотоциклларда ҳаракатланиш унинг севимли машғулотларидан бири бўлган. Аммо сиёсатга киргач бу хоббисидан воз кечган. Бундан ташқари ёшлигидан зарбли мусиқа асбобларини яхши чала олган. Ҳозир ҳам унинг уйида электр барабанлар тўплами бор дейишади. 

Ўша пайтлари ёш Такаитида сиёсатга қизиқиш пайдо бўлади ва фаолиятини Либерал демократик партия билан боғлайди. Айрим қизиқ манбаларга кўра, у бирор марта учрашувга чиқмасдан туриб, 2004 йили партиядоши Таку Ямамото билан турмуш қурган. Улар 2017 йили турли келишмовчиликлар туфайли ажрашади, аммо 2021 йилда улар яна қайта турмуш қуришган. 

Санаэ Такаити Япониянинг собиқ бош вазири Синдзо Абэнинг шогирдларидан бири саналади. Шунингдек, уни Британия собиқ бош вазири Маргарет Тэтчернинг ашаддий мухлиси бўлган, дейишади.  

“Associated Press” ахборот агентлиги қайд этишича, кўплаб япониялик аёллар унинг бош вазир этиб тайинланишини мамлакатда гендер тенглиги йўлидаги ютуқ сифатида кўришмаяпти. Нима учун? Чунки Японияда ҳанузгача патриархал қадриятлар устувор саналади. Масалан, Такаити турмушга чиққан аёлларга ўз қизлик фамилиясини сақлаб қолиш ҳуқуқини беришга қарши. Японияда амалдаги қонунларга кўра, турмуш қурган жуфтликлар бир хил фамилияга эга бўлиши шарт. 

Унинг кўпчиликка маъқул келган жиҳатларидан яна бири – сайлов кампанияси давомида болаларни парвариш қилиш учун солиқ имтиёзлари ва ишчилар учун болалар боғчалари шакллантирган корхоналарни рағбатлантиришни қўллаб-қувватлади.

Шунингдек, у ўзидан аввалги бош вазирнинг АҚШ билан тузган савдо келишувини қайта кўриб чиқиш ниятини билдирган. Такаити жорий ой охирида Жанубий Кореяда ўтадиган Осиё-Тинч океани иқтисодий ҳамкорлик саммитида АҚШ президенти Дональд Трамп билан учрашмоқчи. Ташқи сиёсатда эса Такаити Хитойга қарши позицияси ва Тайванни қўллаб-қувватлаши билан танилган. 

<iframe width="650" height="420" src="https://www.youtube.com/embed/SzuERn7U7yM" title="Boshlovchilikdan Bosh vazirlikkacha" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА