Болгария сайловида россияпараст сиёсий альянс етакчи (+видео)
Болгарияда парламент сайловида россияпараст собиқ президент Румен Радев бошчилигидаги альянс ишончли устунлик билан олдинда бормоқда, деб хабар берди DW нашри.
Дастлабки маълумотларга кўра, бюллетенларнинг 87 фоизи санаб чиқилгандан сўнг Румен Радев партияси тахминан 45 фоиз овоз тўплаб етакчилик қилмоқда.
Иккинчи ўрин учун бошқа партиялар рақобатлашмоқда.
Сўнгги беш йил ичида болгар сайловчилари саккизинчи марта парламент учун овоз берди. Бу вақт мобайнида коалициялар бир неча бор парчаланиб, норозилик намойишлари босими остида истеъфога чиққан.
Болгария ЕИдаги энг камбағал давлатлардан бири бўлиб, мутахассислар фикрича, мамлакат коррупция ва таниш-билишчиликдан жиддий азият чекмоқда. Сайловолди кампанияси давомида сайловчиларни сотиб олиш ҳолатлари аниқланган. Полиция бу ҳолат билан боғлиқ қарийб 1 миллион еврони мусодара қилганини маълум қилди.
Январ ойида президентлик лавозимини тарк этган Радев сайлов кампаниясида “олигархлар”га қарши курашиш ва суд-ҳуқуқ тизимини ислоҳ қилишни ваъда берди. Собиқ ҳарбий учувчи айниқса ёшлар орасида машҳур бўлиб, маълумотларга кўра, 30 ёшгача бўлган ҳар учинчи сайловчи унинг учун овоз берган.
Шу билан бирга, мутахассислар Радевнинг қарашлари Болгария ташқи сиёсатига қандай таъсир қилиши ҳали ноаниқ, дейишмоқда. У аввал Россияга қарши санкцияларга ва Украинага ёрдам беришга қарши чиққан. Бироқ кузатувчилар Болгария иқтисодиётининг ЕИ маблағларига боғлиқлигини ҳисобга олган ҳолда, у мураккаб сиёсий мувозанатни сақлашга мажбур бўлишини таъкидламоқда.
<iframe width="650" height="420" src="https://www.youtube.com/embed/t_aDVa-V5lY" title="Bolgariya saylovida rossiyaparast siyosiy alyans yetakchi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов, ЎзА
