Бильярд: Самарқандда ўтган жаҳон чемпионатида ғолиб ва совриндорлар аниқланди
Самарқанд шаҳрида илк бор бильярд спорт турининг динамик пирамида йўналиши бўйича ўтказилган жаҳон чемпионатининг ғолиб ва совриндорлари аниқланди.
Қадимий ва ҳамиша навқирон шаҳарнинг “Silk Road Samarkand” халқаро туристик марказида ўтказилган муросасиз баҳсларда 10 дан зиёд давлатнинг 150 нафар атрофидаги маҳоратли бильярдчилари куч синашди.
Кеча чемпионатнинг сўнгги кунида ўтган ярим финалнинг биринчи жуфтлигида россиялик Иосиф Абрамов қирғизистонлик Калибек уулу Арсенни, иккинчи жуфтликда иштирок этган ҳамюртимиз Нурбек Саломов россиялик Никита Володинга имкониятни бой берди.
Чемпионатда 3-ўринлар ўзбекистонлик Н. Саломов ва қирғизистонлик Калибек уулу Арсенга насиб этган бўлса, финалда Никита Володинни 9:6 ҳисобида мағлуб этган Иосиф Абрамов жаҳон чемпионлигини қўлга киритди.
Мусобақанинг аёллар йўналишида эса ғолиблик шоҳсупасига беларуслик Екатерина Перепечаева – Чернухо кўтарилди. 2 ва 3-ўринлар россиялик бильярдчи қизларга тегишли бўлди.
Т. Рўзиев, ЎзА
