Банк юристи ва унинг шериги 420 минг доллар «пора» талаб қилгани аниқланди
Давлат хавфсизлик хизмати ва Иқтисодий жиноятларга қарши курашиш департаменти ходимлари ҳамкорлигида Тошкент шаҳрида ўтказилган тезкор тадбирда банк кредити ажратиш билан боғлиқ ноқонуний ҳаракатларга чек қўйилди.
Аниқланишича, хусусий акциядорлик тижорат банкларидан бирининг Олмазор филиали банк хизматлари маркази юристи ҳамда Янгийўл туманида яшовчи, муқаддам судланган шахс (1979 й.т.) ўзаро тил бириктирган. Улар тадбиркорлик билан шуғулланиш истагида бўлган фуқаронинг ишончига кириб, унинг номига 3,5 миллион АҚШ доллари миқдорида имтиёзли кредит ажратиб беришни ваъда қилишган.
Ушбу «хизмати» эвазига кредит суммасининг 12 фоизини, яъни 420 минг АҚШ долларини талаб қилган фирибгарлар келишилган пулдан 50 минг АҚШ долларини олдиндан олаётган вақтида тезкор ходимлар томонидан ашёвий далиллар билан ушланди.
Ҳозирда ушбу шахсларга нисбатан жиноят иши қўзғатилиб, «қамоққа олиш» тарзидаги эҳтиёт чораси қўлланилган. Тергов ҳаракатлари олиб борилмоқда.
Ҳурматли фуқаролар! Кундалик ҳаётда шу каби қонунбузилиш ҳолатларига дуч келсангиз, Давлат хавфсизлик хизматининг 1520 қисқа рақамига мурожаат қилишингиз сўралади. Мурожаат қилувчининг шахси сир сақланиши кафолатланади.
ЎзА
