“АзерТАЖ”: Тошкент халқаро инвестиция форуми рекорд кўрсаткичлар билан глобал эътибор марказида
Пойтахтимизда ўтказилаётган V Тошкент халқаро инвестиция форуми (TIIF-2026) ҳақида Озарбайжоннинг етакчи давлат ахборот агентлиги – “АзерТАЖ” кенг қамровли материал эълон қилди.
Нашрнинг эътироф этишича, жорий йилги форум ўз кўлами ва иштирокчилар сони билан бир қатор рекорд кўрсаткичларга эришмоқда. Тадбирда қатнашувчи компаниялар ва молиявий институтларнинг умумий активлари 42 триллион АҚШ долларини ташкил этиб, бу глобал ЯИМнинг тахминан 38 фоизига тенг экани қайд этилган. Экспертлар фикрича, “TIIF-2026” Марказий Осиё тарихидаги энг йирик инвестиция платформаларидан бири ҳисобланади.
Форумда 100 дан ортиқ давлатдан 3 мингдан ортиқ хорижий делегат, шу жумладан Озарбайжон делегацияси ҳам иштирок этмоқда. Умумий иштирокчилар сони 8 минг нафардан ошиб, бу кўрсаткич форум тарихидаги янги рекорд сифатида қайд этилган.
Таъкидланишича, анжуманни ёритиш учун 41 давлатдан 209 нафар хорижий журналист аккредитациядан ўтган. “Bloomberg”, “Reuters”, “BBC News”, “Euronews”, “Nikkei”, “CGTN” ва “TRT” каби нуфузли ОАВ Тошкентдан бевосита репортажлар узатмоқда.
Таҳлилларга кўра, форум доирасида имзоланадиган йирик инвестиция битимлари Ўзбекистон иқтисодиётининг янада ривожланишига кучли туртки беради.
Ў.Алимов, ЎзА
