Арманистон: Собиқ президент Саргсянга коррупция иши бўйича чеклов(+видео)
Арманистон собиқ президенти Серж Саргсян жиддий айбловлар остида қолди. Суд унга нисбатан муайян чекловлар қўйди, бу кенг қамровли жиноий ишлар доирасидаги янги қадамдир.
Серж Саргсян 2008–2018 йилларда Арманистон президенти бўлган. У 1993–1995 ва 2000–2007 йилларда мамлакат мудофаа вазири лавозимида ҳам ишлаган.
26 август куни Ереван суди Серж Саргсянни эҳтиёт чораси сифатида мамлакатдан чиқмаслик ҳақида тилхат бериш мажбуриятини юклади. Бу ҳақда Armenia Today нашри ҳам Саргсяннинг адвокатига таяниб хабар берди. Шу тариқа, суд Коррупцияга қарши қўмитанинг илтимосини қаноатлантирган. Саргсян Арманистоннинг иккинчи президенти Роберт Кочарян ва бошқа юқори лавозимдаги амалдорлар билан боғлиқ жиноий иш доирасида айбланмоқда. У мудофаа вазири бўлиб ишлаган даврида хизмат ваколатларини суиистеъмол қилганликда гумон қилинмоқда.
Бир неча кун олдин Арманистоннинг собиқ президенти ва Россияпараст «Арманистон» сиёсий блоки раҳбари Роберт Кочарян ушланган эди. Аммо соғлиғи ёмонлашгани сабабли у ҳозир касалхонада. Бу ҳақда «Интерфакс» хабар берди. Кочарян қамоққа олиниши масаласини ҳал қилиш учун судга олиб борилиши керак.
26 августга ўтар кечаси Ереван суди Бош прокуратуранинг Кочаряннинг ўғли Седрак Кочарянни икки ойга қамоққа олиш ҳақидаги талабини ҳам қаноатлантирди. У жуда катта миқдорда пул ювишда айбланмоқда. «Интерфакс» маълумотига кўра, Арманистондаги ушбу жиноий ишлар бўйича яна бир қатор шахслар ҳам гумонланмоқда.
<iframe width="650" height="420" src="https://www.youtube.com/embed/-6tsEgCdLGU" title="Armaniston sobiq prezidenti Sargsyanga mamlakatdan chiqish taqiqlandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов, ЎзА
