Араб Лигаси ташқи ишлар вазирлари Яқин Шарқдаги можаролар, хусусан, Исроилнинг 13 июнда бошланган Эронга ҳужумлари билан боғлиқ воқеаларни муҳокама қилиш учун Истанбулда йиғилди, деб хабар бермоқда “Anadolu” ахборот агентлиги.
Улар 21-22 июнь кунлари бўлиб ўтадиган Ислом ҳамкорлик ташкилоти (ИҲТ) Ташқи ишлар вазирлари кенгашининг 51-сессияси йиғилишида иштирок этиш учун Туркияга ташриф буюришди.
Фавқулодда йиғилишдан сўнг эълон қилинган якуний баёнотда айтилишича, Исроил ҳужуми “БМТга аъзо давлат суверенитетини очиқдан-очиқ бузиш ва минтақавий тинчлик ва хавфсизликка таҳдид” ҳисобланади.
Вазирлар шунингдек, БМТ Хавфсизлик Кенгашини тез ҳаракат қилишга ва кескинликни тўхтатиш учун масъулиятни ўз зиммасига олишга чақирди ҳамда қарама-қаршиликни юмшатиш бўйича дипломатик саъй-ҳаракатларни қўллаб-қувватлади.
Баёнотда Исроилнинг Ғазо секторидаги сўнгги жанговар ҳаракатлари ва босиб олинган Ғарбий Соҳилдаги ноқонуний ҳаракатларни тўхтатиш талаб қилинган. Вазирлар Исроилнинг хатти-ҳаракати минтақани кенгроқ можарога яқинлаштираётгани ҳақида огоҳлантирди.
Ў.Алимов, ЎзА