АҚШда Трамп рейтинги энг паст даражага тушди
АҚШ Президенти Дональд Трампнинг фаолиятини қўллаб-қувватлаш кўрсаткичи энг қуйи даражага тушиб кетди. Бу ҳақда Британиянинг “Focaldata” компанияси “Financial Times” нашри учун ўтказган сўровнома натижасида маълум қилинди.
Тадқиқотга кўра, америкалик сайловчиларнинг атиги 33 фоизи давлат раҳбарининг Оқ уйдаги фаолиятини маъқуллаган. Аввалроқ ушбу кўрсаткич 35 фоиз эди. Республикачилар партияси тарафдорлари орасида ҳам етакчини қўллаб-қувватлаш даражаси 72 фоизгача пасайиб, аксил рекорд қайд этилган.
Сўралганларнинг аксари Вашингтон юритаётган савдо сиёсати ва маъмурият томонидан жорий этилган бож тарифига салбий муносабат билдирган. Аҳоли бундай чекловни мамлакатда турмуш даражаси қимматлашишининг асосий сабаби сифатида эътироф этган. Сўровда қатнашганларнинг учдан икки қисми АҚШ иқтисодиёти нотўғри йўналишда кетаётганини таъкидлаган, 57 фоиз одам Трамп сиёсати уларнинг шахсий молиявий аҳволига салбий таъсир кўрсатганига урғу берган. 56 фоиз респондент Канадага нисбатан қўлланган янги савдо божидан норозилик билдириб, нарх янада ошишидан хавотирда эканини айтган.
Шунингдек, нашр Америка раҳбарининг сиёсий таъсири заифлашаётганига ҳам эътибор қаратган. Сайловчиларнинг 46 фоизи амалдаги Президентнинг ҳатти-ҳаракати Конгрессга оралиқ сайловда республикачилар мавқеига путур етказади, деб ҳисобламоқда. Иштирокчиларнинг 47 фоизи эса айнан Трамп томонидан илгари сурилган номзодларга овоз бермаслигини таъкидлаган.
Мазкур сўровнома 28 августдан 1 сентябрга қадар рўйхатдан ўтган 1914 нафар сайловчи ўртасида ўтказилди.
Ф.Яхшибоева, ЎзА
