АҚШда Мустақиллик куни 402 киши ҳибсга олинди
Калифорния штати Ньюпорт-Бич шаҳрида Мустақиллик куни байрами оммавий тартибсизлик билан якунланди.
Шаҳар полицияси маълумотига кўра, байрам давомида жами 402 шахс ҳибсга олинган. Уларнинг тахминан ярми шанба оқшоми Балбоа ярим оролида содир бўлган йирик фавқулодда воқеа чоғи қўлга олинган. Полиция томонидан тарқатилган суратларда жуда кўп одам тўпланган жойда ерга яқин масофада портлаётган фейерверклар ва тартибсизлик акс этган.
4 июль куни байрам тадбирлари шаҳарда минглаб одамни жалб қилди. Кечга яқин ижтимоий тармоқдаги чақириқ сабаб, Ньюпорт-Пир соҳили атрофига қисқа вақтда кўп сонли ўсмир ва ёш тўпланди. Полиция маълум қилишича, айнан шундан сўнг вазият тезда назоратдан чиқди. Ҳуқуқ-тартибот идоралари хабарига кўра, йиғилганлар орасида муштлашув юз берган, айрим кўчалар тўсиб қўйилган, ноқонуний пиротехника воситалари ишлатилган ҳамда маҳаллий “Pavilions” супермаркети талон-торож қилинган. Шунингдек, баъзи шахслар фейерверкни одамлар тўпланган жойга ёки полиция ходимларига қарата отган. Оқибатда бир полициячи миномёт туридаги пиротехника зарбасидан жароҳат олган.
Вазият кескинлашгач, полиция йиғилишни ноқонуний. деб эълон қилди. Шундан кейин маҳаллий полицияга қўшимча 17 ҳудудий ҳуқуқни муҳофаза қилиш идорасидан жалб этилган 350 ходим жалб қилиниб, оломон тарқатилди, йўллар очилиб, аҳоли ва меҳмонлар хавфсизлиги таъминланди.
Полиция маълумотида ўтган йил худди шу давр – 3 июль ярим тундан 5 июль соат 06:00 гача атиги 60 киши ҳибсга олингани келтирилган. Бу йил эса айни кўрсаткич 402 нафарга етган. Дарвоқе, тахминан 200 одам 28-кўча атрофида полициянинг бир неча бор янграган тарқалиш тўғрисидаги қонуний буйруғига бўйсунмагани учун қўлга олинган.
Ф.Яхшибоева, ЎзА
