АҚШ Халқаро жиноят судига яна тиш қайрамоқда
Вашингтон Халқаро жиноят суди раҳбари Томоко Аканэ ва катта прокурор Абдулайе Сейега нисбатан янги санкция жорий қилди. АҚШ давлат котиби Марко Рубио уларни мамлакат розилик бермаган ҳолда америкалик ва бошқа давлатлар фуқароларини тергов қилиш ҳамда жавобгарликка тортиш жараёнида қатнашганликда айблади.
Рубио ХЖСни “коррупцияга ботган ва сиёсийлашган” тузилма деб атади. Унинг фикрича, маҳкама ваколати доирасидан анча чиқиб кетган. Вашингтон аввал ҳам ушбу ташкилотни Исроилга нисбатан сиёсий ҳаракат уюштиришда айблаб келган.
Гаагада жойлашган суд санкцияга кескин муносабат билдирди. Таъкидланишича, янги чеклов қонун устуворлигига путур етказади. Қолаверса, ҳуқуқ меъёрини қўллагани учун судья ва бошқа ходимларга босим ўтказилиши бутун халқаро ҳуқуқий тизим учун хавфли экани қўшича қилинган.
АҚШнинг босими эса тобора кучаймоқда. Июль ойида Қўшма Штатлар маъмурияти ХЖС фаолиятини “тизимли равишда издан чиқариш” режаси борлигини билдирган. Бундан ташқари суд ходимларига нисбатан санкция қўллаш, визани бекор қилиш ва сафар учун тақиқ қўйиш эҳтимоли илгари сурилган. 2024 йил ноябрда эса суд Исроил Бош вазири Биньямин Нетаньяхуни ҳибсга олишга ордер берган.
Мусулмон Зиё, ЎзА
