-
АҚШ Президенти Дональд Трамп маъмурияти 43 давлат фуқароларининг мамлакатга киришини қийинлаштириш имкониятини кўриб чиқмоқда, деб ёзди “New York Times” газетаси.
Нашр тақдим этган жадвалга кўра, Вашингтон 11 мамлакат – Афғонистон, Бутан, Венесуэла, Эрон, Куба, Шимолий Корея, Ливия, Сомали, Судан, Сурия ва Яман фуқароларининг АҚШга киришини бутунлай тақиқлаши мумкин.
Россия, Беларусь, Туркманистон, Эритрея, Гаити, Лаос, Мьянма, Покистон, Сьерра-Леоне ва Жанубий Судан фуқаролари учун визани “кескин чеклаш” чорасини ўйлаяпти.
Таъкидланишича, АҚШга кириш “юқори даромадли бизнес саёҳатчилар” учунгина мумкин, миграция ёки сайёҳлик визаси билан келмоқчи бўлганларга эмас.
Юқорида саналган юртлардан АҚШга бориш тўлиқ ёки қисман тақиқланишининг мантиқий сабаби номаълумлигича қолмоқда.
Яна 22 давлат, жумладан Ангола, Зимбабве, Мали, Чад, Камерунга “ташвиш” омилини бартараф этиш учун 60 кун муддат берилиши режалаштирилган. Бу мамлакатларнинг ҳар бири виза тартиби тўлиқ тақиқланган ёки кескин чекланган тоифага киритилиши ҳам мумкин.
– Россия сайёҳлари учун тўлиқ тақиқ жорий қилинмаса-да, кескин чеклаш таклифи ҳам бир саволни туғдирмоқда... Трамп АҚШ ташқи сиёсатини Россияга нисбатан қулайроқ йўналиш бўйича ўзгартиришга уринмоқда, – дея таъкидлаган газета.
Бу таклифлар Давлат департаменти томонидан бир неча ҳафта олдин ишлаб чиқилган ва Оқ уйга юборилган. Рўйхатга эса ҳали тузатиш киритилиши мумкин.
Жадвал элчихоналар, хавфсизлик бўйича экспертлар, разведка ҳамжамияти ва бошқа идоралар томонидан кўриб чиқилмоқда.
– Улар муайян мамлакатга хос камчиликнинг тавсифини, сиёсий сабаб бор-йўқлигини текширади, бирор устувор йўналиш бўйича ҳамкорликни бузиш хавфини олдини олиш мақсадида изоҳ беради, – дейилган ахборотда.
Амалда визаси бор шахсларга тақиқ таъсир этиш-этмаслиги, қонуний тарзда доимий яшаш учун рухсат берилган амалдаги яшил карта эгаларига нисбатан қандай йўл тутилиши ҳам номаълум.
Маълумки, Трамп сайлов олди кампанияси даврида АҚШни ноқонуний муҳожирлардан “тозалаш” асосий мақсади эканини кўп такрорлаган. Президент бўлгандан кейин эса, яъни январь ойида чиқарган дастлабки фармонларидан бири ноқонуний муҳожирларни ушлаш ва депортация қилишга қаратилди. Фармон ижросини таъминлашга барча куч ишлатар тизимлар сафарбар этилди. Натижа қандай?
Сўнгги маълумотга кўра, ҳозир АҚШда ушланган муҳожирлар 47 600 нафар. Маъмурият уларни сақлаш учун жой қидирмоқда. Бу ҳақда “Рейтер” агентлиги Иммиграция ва божхона хизмати (ICE)нинг номи айтилмаган юқори мартабали ходимига таяниб ёзди.
Таъкидланишича, 20 январдан 10 мартгача ИCЕ 32 800 га яқин хорижликни ҳибсга олган. Маълум бўлишича, уларнинг атиги 27 фоизи иммиграция қонунини бузгани гумон қилинган.
Аввалроқ Вакиллар палатаси Бюджет қуйи қўмитаси раҳбари Марк Амодей CNN телеканалига Президент маъмурияти ноқонуний муҳожирларни оммавий депортация қилишнинг жорий суръатини 60 кундан ортиқ давом эттира олмаслиги, ажратилган маблағ тугаб бораётганини билдирган эди. Унинг таъкидлашича, депортация қилинган мигрантларни сақлаш учун ажратилган 45 000 ўрин аллақачон тўлган, тизим ҳозирги оқимни қайта ишлашга улгурмаяпти.
С.Раҳимов, ЎзА