АПЛ: Абдуқодир Ҳусанов порлаган биринчи тур якунланди
Футбол бўйича Англия Премьер-лигасининг 1-туридан ўрин олган сўнгги учрашувда «Челси» сафарда «Фулҳэм» билан тўқнаш келди ва 3:2 ҳисобида зафар қучди.
Учрашувда меҳмонлар сафида Жоао Педро 1-дақиқадаёқ ҳисобни очди. Жамоа сафига янги қўшилган Морган Рожерс 41-дақиқада гол урган бўлса, Коул Палмер 49-дақиқада рақиб дарвозасини ишғол қилди. Шунингдек, Палмер ва Жоао Педро биттадан голли узатмани ҳам ўз ҳисобларига ёздириб қўйди.
«Фулҳэм» сафида Жошуа Кинг 23-дақиқада, Гонсало Гарсия эса 54-дақиқада гол урди. Бироқ, мезбонлар қолган вақтда ҳисобни тенглаштира олмади.
Ушбу учрашув «Челси» учун Хаби Алонсо бош мураббийлигидаги дастлабки расмий ўйин бўлди. Испаниялик мутахассис жамоани жорий мавсум арафасида қабул қилиб олган эди.
Эслатиб ўтамиз, лиганинг илк турида “Манчестер Сити” 2:1 ҳисобида “Борнмут” клубини таслим этган эди. “Манчестер Сити” таркибида ҳаракат қилаётган ҳамюртимиз Абдуқодир Ҳусанов учрашувни асосий таркибда бошлади. Марказий ҳимоячи сифатида майдонга тушган ҳамюртимиз баҳсни тўлиқ ўтказди.
А.Ҳусанов учрашув давомида 90 та узатманинг 87 тасини аниқ амалга оширди. Бу 97 фоизлик пас аниқлигини ташкил этди. Шунингдек, футболчимиз тўпга 97 марта тегинди. Статистик маълумотларга ихтисослашган “Flashscore” портали Абдуқодир Ҳусановнинг ўйинини 8,2 баллга баҳолади. “Sofascore” эса унинг ҳаракатларини 7,0 баллга лойиқ кўрди.
Шу тариқа, Англия Премьер-лигасининг 2026/27 йилги мавсумида биринчи тур учрашувлари якунланди. Дастлабки турдан сўнг турнир жадвалида «Брайтон», «Арсенал» ва «Брентфорд» жамоалари 3 очкодан жамғарган ҳолда голлар нисбатига кўра кучли учликдан жой олди.
Шунингдек, «Эвертон», «Халл Сити», «Челси», «Ипсвич», «Манчестер Сити» ва «Лидс» жамоалари ҳам мавсумни ғалаба билан бошлаб, 3 очкодан тўплади. «Ливерпуль» ва «Ньюкасл» биринчи турда дуранг ўйнаб, бир очкодан жамғарди. Улар турнир жадвалида мос равишда 10 ва 11-ўринларни банд этган.
Биринчи турдан кейин «Фулҳэм», «Борнмут», «Сандерленд», «Ноттингем Форест», «Кристал Пэлас», «Манчестер Юнайтед», «Ковентри», «Тоттенҳэм» ҳамда «Астон Вилла» ҳисобида очко мавжуд эмас. Улар тўплар нисбатига кўра, 12–20-ўринларни эгаллаб турибди.
Англия Премьер-лигасининг 2-тур учрашувлари 28–31 август кунлари ўтказилади ва унда қуйидаги баҳсларга гувоҳ бўламиз:
28 август: «Кристал Пэлас» — «Манчестер Сити»;
29 август: «Ливерпуль» — «Ноттингем Форест», «Ковентри Сити» — «Халл Сити», «Борнмут» — «Эвертон» ҳамда «Тоттенҳэм» — «Ньюкасл»;
30 август: «Челси» — «Брайтон», «Сандерленд» — «Фулҳэм», «Лидс» — «Брентфорд» ва «Манчестер Юнайтед» — «Ипсвич»;
31 август: «Астон Вилла» — «Арсенал».
Жавоҳир Тошхўжаев,
ЎзА
