Anadolu: Эрон ва АҚШ тўқнашуви кескинлашди

Эрон Ислом инқилоби муҳофизлари корпуси (ИИМК) АҚШнинг авиа ташувчи ва эсминчи кемаларига баллистик ракета орқали ҳужум уюштирилганини маълум қилди. Теҳрон томони таъкидлашича, ҳар икки ҳарбий кема шикастланиб, тўқнашув ҳудудини тарк этган.

Баёнотда ушбу кемалар Эрон кемаларига халақит бергани ва денгиз қамалида иштирок этгани билдирилган. Шунингдек, Теҳрон томони АҚШ Марказий қўмондонлиги (CENTCOM) ушбу зарбаларни тан олганини таъкидлаб, Вашингтонни кейинги ҳарбий ҳаракат янада оғирроқ оқибатга олиб келишидан огоҳлантирди.

ИИМК ҳарбий-денгиз кучлари Американинг Ҳурмуз бўғозидаги муҳофаза қилинадиган ҳудудга киришга уринган масофадан бошқариладиган кемаси ҳам ҳужумга учраганини маълум қилди. Бўғоз Ислом Республикаси назоратидалигини яна бир бор эслатиб, АҚШ кучларини минтақани тарк этишга чақирди. Шунингдек, АҚШ Эрон танкерларига берган зарбага жавобан Ҳурмуз ва бошқа ҳудудларда америкаликларга алоқадор бир неча танкер ва кема нишонга олингани билдирилган.

Ўз навбатида, Марказий қўмондонлик Эрон томонидан учирилган баллистик ракеталар қўриқлаш хизматидаги икки ҳарбий кемага қаратилгани, кемалар эса зарбани четлаб ўтгани ва америкалик ҳарбийлардан ҳеч ким жабрланмаганини таъкидлаган. Жавоб тариқасида Вашингтон Теҳроннинг уч хом нефть танкерига зарба берган.

Февраль ойида АҚШ ва Исроил томонидан Эронга берилган зарбалардан сўнг бошланган мазкур низо минтақада ҳануз давом этмоқда.

Ф.Яхшибоева, ЎзА