Зеленский: Украина Донбассдан воз кечмайди
Президент Владимир Зеленский “Sky News” телеканалига берган интервьюсида россиялик тадбиркор Роман Абрамович орқали Владимир Путинга Украина позицияси етказилганини маълум қилди.
Маълум қилинишича, Абрамович Киевга Россия – Украина урушини якунлаш имкониятини муҳокама қилиш мақсадида келган. Мулоқот давомида асосий масала Донбасс бўлган.
– Мен унга аниқ айтдим: биз ўз ҳудудимиздан кетмаймиз. Донбассни ташлаб қўймаймиз ва бундай йўл билан ғалаба қозонишингизга йўл қўймаймиз, – деган Украина раҳбари.
Шунингдек, Зеленский Путин билан шахсан учрашишга тайёрлигини яна бир бор такрорлаган:
– Мен эртагаёқ, исталган форматда учрашишга тайёрман. Фақат бу Россия, Беларусь ёки Минскда бўлмаслиги керак.
Қайд этиш жоиз, Роман Абрамович Россия ва Украина ўртасидаги воситачилик жараёнида 2022 йилдан буён иштирок этиб келмоқда. У Истанбул музокараси, “ғалла битими” ҳамда ҳарбий асирлар алмашинуви бўйича мулоқотда ҳам қатнашгани айтилмоқда.
Д.Ҳакимов, ЎзА
