Зеленский самолёти Молдовада дрон хавфи туфайли кечиктирилди (+видео)
Украина президенти Володимир Зеленскийнинг самолёти Молдовадан Норвегияга учиб кетаётганида дрон билан тўқнашиб кетишига сал қолди, деди Норвегия бош вазири Йонас Гар Стёре. Бу ҳақда DW нашри хабар қилди.
«Унинг самолёти Молдовадан учиши керак бўлган пайтда дрон билан тўқнашиб кетишига сал қолди, — деди Стёре. Бироқ у бу маълумотни қаердан олганини айтмади. Шунингдек, дрон самолётга тасодифан яқинлашганми ёки Зеленскийга қарши қасддан қилинган ҳаракат бўлганми, бу ҳам аниқ эмас.
Норвегия бош вазири идораси Стёренинг сўзларига аниқлик киритди: «Кеча Молдова ҳаво ҳудудида дронлар билан боғлиқ хавф юзага келган ва бу Зеленскийнинг Ослога учишини кечиктирган. Бундай хавфга у деярли ҳар куни дуч келади. Дронлар унинг самолётига қанчалик яқин бўлгани номаълум».
Украиналик юқори лавозимли амалдор DW телеканалига маълум қилишича, Зеленскийнинг самолёти Кишинёвдан учишни кутаётган пайтда Россияга тегишли реактив дрон Молдова ҳаво ҳудудига кирган. Шундан сўнг Зеленскийнинг учиши кечиктирилган, бошқа рейслар ҳам вақтинча тўхтатилган.
Володимир Зеленский 8 сентябрь кечқурун Молдовадан Ослога борган. У ерда Норвегия қироли Ҳаральд V нинг дафн маросимида қатнашган. Маросимдан сўнг Украина президенти Норвегия бош вазири билан учрашган. Норвегия ҳукуматининг уларнинг музокаралари ҳақидаги расмий хабарида дрон билан боғлиқ ҳодиса тилга олинмаган.
9 сентябрь куни Молдова полицияси қулаган дрон топилганини маълум қилди. Дрон ерга урилганда портлаш содир бўлган ва катта чуқурлик ҳосил қилган. Дрон ичида металл шарчалар кўринишидаги зарар етказувчи элементлар бўлган. Жабрланганлар ҳақида маълумот берилмаган.
Маҳаллий маъмуриятнинг маълум қилишича, 9 сентябрга ўтар кечаси Россия дронлари Одесса вилоятида, Молдова чегараси яқинида жойлашган халқаро автомобиль назорат-ўтказиш пунктига ҳужум қилган. Зеленский Ослога учиб кетган аэропорт ушбу чегара пунктидан тахминан 160 км узоқликда жойлашган.
<iframe width="640" height="420" src="https://www.youtube.com/embed/y3ZiY89hl9U" title="Zelenskiy samolyoti Moldovada dron xavfi tufayli kechiktirildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА
