Өзбекстандық студенттер халықаралық ақпараттық технологиялар байқауында үздіктер қатарынан көрінді
Қытайдың Шэньчжэнь қаласында ақпараттық-коммуникациялық технологиялар саласындағы дарынды жастарды қолдауға арналған «Huawei АКТ байқауы 2025–2026» халықаралық жарысының финалдық кезеңі өтті.
Бұл байқау ақпараттық-коммуникациялық технологиялар саласындағы ең ірі халықаралық білім беру жобаларының бірі саналады. Ол әлемнің түкпір-түкпірінен келген студенттер мен оқытушыларды бір алаңға жинап, қатысушыларға кәсіби білімін жетілдіруге, тәжірибелік дағдыларын дамытуға, сондай-ақ инновациялық идеялары мен технологиялық шешімдерін таныстыруға мүмкіндік береді.
Байқау ұлттық, өңірлік және халықаралық кезеңдер бойынша ұйымдастырылды. Биылғы маусымда әлемнің жүзден астам еліндегі екі мыңнан астам жоғары оқу орнынан 210 мыңнан астам студент қатысқан.
Айта кетейік, жоба Қытайдың ұлттық студенттік жарыстар тізіміне енгізілген және ЮНЕСКО жанындағы Жаһандық дағдылар академиясының жетекші бағдарламаларының бірі ретінде танылған.
Байқауда Өзбекстан атынан Ташкент ақпараттық технологиялар университеті, Инха университеті және Турин политехникалық университеті командалары өнер көрсетті.
Қатысушылар жасанды интеллект, бұлттық есептеу технологиялары және өзге де заманауи цифрлық құралдарды пайдалана отырып, әлеуметтік әрі коммерциялық маңызы бар мәселелердің инновациялық шешімдерін ұсынды.
Финалдық кезең қорытындысы бойынша Өзбекстан өкілдері жоғары нәтижелерге қол жеткізді. Атап айтқанда, Ташкент ақпараттық технологиялар университетінің командасы «Тәжірибелік байқау – желілік технологиялар бағыты» бойынша бірінші орынды иеленді.
Сонымен қатар Ташкент ақпараттық технологиялар университеті, Инха университеті және Турин политехникалық университеті студенттерінен құралған бірлескен команда «Тәжірибелік байқау – бұлттық технологиялар бағыты» бойынша үшінші орынға ие болды.
Бұл жетістік өзбекстандық жастардың ақпараттық технологиялар саласында әлеуеті жоғары екенін көрсетті. Олардың халықаралық деңгейдегі бәсекеге қабілеттілігі мен кәсіби дайындығының жоғары екені осы нәтижелерден байқауға болады.
