Өзбекстан Президенті Түркістанның тарихи-мәдени орталығымен танысты
Өзбекстан Республикасының Президенті Шавкат Мирзиёев Түркі мемлекеттері ұйымына мүше елдер делегацияларының басшыларымен бірге Түркістан қаласының тарихи-мәдени орталығында болды.
Жоғары мәртебелі қонақтар Орталық Азиядағы ислам сәулет өнерінің жарқын ескерткіштерінің бірі, Қазақстанның басты рухани орталығы саналатын Қожа Ахмет Ясауи кесенесіне зиярат етті.
XIV ғасырдың соңында Әмір Темірдің бұйрығымен салынған бұл кесене бүгінде ЮНЕСКО-ның Бүкіләлемдік мұралар тізіміне енгізілген. Ол Орталық Азиядағы ортағасырлық ислам сәулетінің ең бірегей әрі көрнекті үлгілерінің бірі саналады. Құрылысы 1389–1391 жылдары басталып, XIV ғасырдың соңына дейін жалғасқан. Кешенді тұрғызуға Мауараннахр шеберлері, сондай-ақ өзге өңірлерден келген сәулетшілер мен нақышшылар қатысқан.
Көшбасшылар ұлы сопы ақын әрі ойшылдың рухына тағзым етті.
Сонымен қатар делегация басшылары «Әзірет Сұлтан» музей-қорығының сапар орталығымен танысты. Мұнда зияратшылар мен қонақтарды қабылдау, көрмелер ұйымдастыру және Түркістанның бай тарихи-мәдени мұрасын таныстыру үшін заманауи жағдай жасалған. Орталықта ортағасырлық кезеңге тиесілі құнды мұраларды сақтау, зерттеу және кеңінен насихаттауға арналған тұрақты музей экспозициясы – «Бірегей экспонаттар залы» ерекше орын алады.
Экспозицияда Қожа Ахмет Ясауи кесенесіне қатысты бірегей тарихи жәдігерлер, соның ішінде XIV–XV ғасырларға тиесілі құнды бұйымдар, ортағасырлық сәулет және қолданбалы сән өнері, сондай-ақ қыш өнерінің үлгілері қойылған. Кесененің түпнұсқа есігі, Қожа Ахмет Ясауи қабірінің жабуы, Әмір Темір сыйға тартқан қола шамдар, сондай-ақ Түркістанның көне тарихынан сыр шертетін археологиялық және керамикалық олжалар да осында ұсынылған.
Мұндай тарихи ескерткіштер мен мәдени жобалар рухани мұраны сақтауда, тарихи жадты жаңғыртуда және ортақ тамыр, сенім мен дәстүр арқылы байланысқан бауырлас халықтарды жақындастыруда ерекше маңызға ие екені атап өтілді.
