Замонавий уй-жойлар бунёд этилмоқда
ФОТОРЕПОРТАЖ
Андижон вилоятининг шаҳар ва туманларида янги турар жойлар барпо этиш, мавжуд ҳудудларни ободонлаштириш ва аҳоли учун қулай яшаш шароитларини яратишга қаратилган қурилиш ишлари давом этмоқда. Бу жараёнда хусусий сектор вакиллари ҳам фаол иштирок этмоқда.
Жумладан, “Иморат қурилиш таъмирлаш” хусусий корхонаси томонидан вилоятнинг бир қатор ҳудудларида замонавий турар жой объектлари барпо этилмоқда. Қурилиш жараёнида лойиҳа ечимлари, сифатли материаллар ва замонавий технологиялардан фойдаланишга алоҳида эътибор қаратилмоқда.
[gallery-30829]
Турар жой мажмуаларида хонадонлар билан бир қаторда, аҳоли учун зарур инфратузилма объектлари ҳам назарда тутилган. Хусусан, болалар майдончалари, автомобиллар учун тўхташ жойлари, пиёдалар йўлаклари ва муҳандислик-коммуникация тармоқлари барпо этилмоқда. Бу эса янги турар жой ҳудудларида аҳоли учун қулай муҳит шаклланишига хизмат қилмоқда.
Қурилиш ишларининг кенгайиши маҳаллий аҳоли бандлигини таъминлашга ҳам ижобий таъсир кўрсатмоқда. Жараёнга қурувчилар, муҳандислар, техник мутахассислар ва бошқа соҳа вакиллари жалб этилмоқда. Шунингдек, маҳаллий ишлаб чиқарувчилар билан ҳамкорлик қилиш орқали қурилиш материалларига бўлган талабнинг бир қисмини ички имкониятлар ҳисобига таъминлашга эътибор қаратилмоқда.
Вилоятнинг турли ҳудудларида барпо этилаётган кўп қаватли уй-жойлар аҳолининг замонавий ва қулай хонадонларга бўлган эҳтиёжини қондиришга хизмат қилмоқда. Қурилиш ишларининг изчил давом эттирилиши ҳудудларнинг замонавий қиёфасини шакллантириш ва янги яшаш массивларини барпо этиш имконини бермоқда.
Зуҳриддин УМУРЗОҚОВ(сурат),ЎзА
