Ёшларнинг глобал муаммолар ҳақидаги фикри тингланди
Пойтахтимизда бўлиб ўтган Бирлашган Миллатлар Ташкилотининг “Ёшлар тинчлик учун” модели доирасида иштирокчилар бугунги кундаги мураккаб глобал муаммоларни муҳокама қилиб, амалий таклиф ва ечимларни ишлаб чиқишга қаратилган музокараларда иштирок этди.
Музокаралар БМТнинг 2030 йилгача мўлжалланган Барқарор ривожланиш кун тартиби билан уйғун ҳолда олиб борилиб, сифатли таълим, гендер тенглиги, иқлим бўйича чоралар, тинчлик, адолат ва самарали институтлар каби йўналишларни қамраб олди.
“Жаҳон ёшларининг тинчлик сари ҳаракати”нинг ташкил этилиши эса мулоқот доирасидан ташқарида ҳам ёшлар ташаббусларини доимий қўллаб-қувватлаш учун барқарор макон яратди. Икки ташаббус ёшларнинг халқаро мулоқотдаги иштирокини кенгайтириш, уларнинг БМТ тизими билан ҳамкорлигини кучайтириш ҳамда тинчлик ва барқарор ривожланишга қаратилган амалий ташаббусларини қўллаб-қувватлашга хизмат қилди.
Мутахассисларнинг қайд этишича, бу каби тадбирлар ёшларнинг халқаро майдондаги тажрибасини ошириш, ўз фикрини эркин ва асосли ифодалаш, музокара олиб бориш, жамоа билан ишлаш кўникмаларини ривожлантиришга хизмат қилади.
Тадбир якунида энг яхши натижа кўрсатган уч нафар қатнашувчи махсус кубоклар билан тақдирланди, барча иштирокчиларга эса сертификатлар топширилди.
Г.Бобоева, ЎзА
