“Яшил” энергетикага таянадиган давлатлар глобал иқтисодий рақобатда устунликка эга бўлади (+видео)
Президент Шавкат Мирзиёевнинг Осиё тараққиёт банки Бошқарувчилар кенгашининг йиллик йиғилишидаги нутқида илгари сурилган фикрлар, таклифлар бугунги глобал иқтисодий трансформация шароитида энергия хавфсизлиги ва “яшил” тараққиёт масалаларини устувор йўналиш сифатида белгилаб бермоқда.
Сенатнинг Аграр, сув хўжалиги масалалари ва экология қўмитаси раиси Анвар Тўйчиев шу ҳақда муносабат билдирди:
– Энергия хавфсизлиги ва “яшил” тараққиёт мамлакатимиз стратегиясининг энг муҳим ва узоқни кўзлаган қисми ҳисобланади.
Аввало, рақамли технологиялар ва сунъий интеллект ривожи энергия ресурсларига бўлган талабни кескин ошираётгани ҳақидаги фикр тўлиқ асосли. Бугунги кунда дата марказлар, сунъий интеллект платформалари ва рақамли инфратузилмалар катта ҳажмда электр энергиясини талаб қилмоқда.
Халқаро энергетика агентлиги таҳлиллари ҳам бу тенденцияни тасдиқлаб, яқин йилларда энергия истеъмоли бир неча баробарга ошишини кўрсатмоқда. Бу эса ҳар бир давлат олдига янги чақириқ – барқарор ва рақобатбардош энергетик тизим яратиш вазифасини қўймоқда.
Шу нуқтаи назардан, инвесторлар учун арзон, ишончли ва экологик тоза энергия манбаларини таклиф қилиш масаласи стратегик аҳамият касб этади.
Президентимиз томонидан қайд этилганидек, айнан “яшил” энергетикага таянадиган давлатлар глобал иқтисодий рақобатда устунликка эга бўлади. Бу – келажак иқтисодиётининг асосий мезонларидан бири.
Мамлакатимизда бу борада амалга оширилаётган ишлар ҳам эътиборга лойиқ. Дунёнинг етакчи компаниялари билан ҳамкорликда 5,6 минг мегаватт қувватга эга шамол ва қуёш электр станцияларининг ишга туширилиши – бу нафақат энергетик мустақилликни мустаҳкамлаш, балки экологик барқарорликни таъминлаш йўлидаги муҳим қадамдир.
“Яшил” энергия улушининг 30 фоизга етказилгани ва 2030 йилга бориб уни 54 фоизга чиқариш режаси мамлакатимизнинг аниқ ва изчил “яшил” стратегияга эга эканини кўрсатади.
Айниқса, Марказий Осиёнинг қайта тикланадиган энергия бўйича улкан салоҳиятини ҳисобга олган ҳолда минтақавий ҳамкорликни кучайтириш ташаббуси ўта долзарб.
Осиё тараққиёт банки кўмагида “Марказий Осиё- Европа яшил энергетика коридори”ни яратиш ғояси нафақат иқтисодий, балки геостратегик аҳамиятга эга. Бу лойиҳа минтақа давлатларини ягона энергетик маконга бирлаштириб, тоза энергия экспортини кенгайтириш имконини беради.
Мазкур ташаббуслар Ўзбекистоннинг нафақат миллий, балки минтақавий ва глобал даражада ҳам “яшил” тараққиёт драйверларидан бирига айланиш салоҳиятини намоён этмоқда.
Таъкидлаш жоизки, бу каби ёндашувлар келгусида иқтисодий ўсиш, экологик барқарорлик ва инвестициявий жозибадорликни таъминлашда ҳал қилувчи аҳамиятга эга бўлади.
<iframe width="560" height="315" src="https://www.youtube.com/embed/L9e71ePU9JM?si=7m0oRKZMS1JwDBjx" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Норгул Абдураимова,
Ёқуб Мелибоев (видео), ЎзА
