Япония Сурияга қўйилган санкцияни бекор қилди
Япония Ташқи ишлар вазирлиги мамлакат ҳукумати Суриянинг нефть, банк ва телекоммуникация соҳаларида фаолият юритувчи қатор давлат агентликлари ҳамда компанияларига нисбатан жорий этилган чеклов бекор қилинишини билдирди.
Расмий баёнотга кўра, хусусан Мудофаа ва Ички ишлар вазирликларига қарши қўлланган чора олиб ташланди. Шунингдек, “Syrian Petroleum Company”, “Syria Trading Oil Company”, “Commercial Bank of Syria” ва “Syriatel” каби йирик жамоалар активини музлатиш бўйича илгари амалда бўлган чеклов ҳам кучини йўқотди.
Кун чиқар юрт дипломатик идораси қарор ушбу араб диёридаги сиёсий ва ижтимоий ўзгариш ҳамда икки томонлама муносабатнинг ҳозирги босқичини эътиборга олган ҳолда қабул қилинганини таъкидлади.
Эслатиб ўтамиз, 2025 йил Токио Сурияга қарши санкция тартибини қисман юмшатиб, “Industrial Bank”, “Popular Credit Bank”, “Saving Bank” ва “Agricultural Cooperative Bank” каби молия муассасаларини қора рўйхатдан чиқарган эди.
Ф.Яхшибоева, ЎзА
