“Янги Ўзбекистон” массивлари замонавий иссиқлик инфратузилмаси билан таъминланди
Мамлакатимизда коммунал инфратузилмани модернизация қилиш ва аҳолини барқарор иссиқлик таъминоти билан қамраб олиш сўнгги йилларда давлат сиёсатида устувор йўналишлардан бирига айланди. Айниқса, янги турар жой массивлари барпо этилаётган ҳудудларда иссиқлик тизимининг самарали ва узлуксиз ишлаши аҳоли турмуш сифатига бевосита таъсир кўрсатади.
Шу боис 2025 йил давомида мамлакатимизда мавжуд иссиқлик таъминоти объектларини янгилаш, эски тармоқларни реконструкция қилиш ҳамда “Янги Ўзбекистон” массивларини замонавий иссиқлик инфратузилмаси билан таъминлаш бўйича кенг кўламли лойиҳалар амалга оширилди.
2025 йил давомида мамлакатимизда аҳолини сифатли иссиқлик таъминоти билан таъминлаш, эски инфратузилмани янгилаш ҳамда “Янги Ўзбекистон” массивларида барпо этилаётган уй-жойларни марказлашган иссиқлик тизимига улаш мақсадида кенг кўламли ишлар амалга оширилди.
“Иссиқликтаъминоти” АЖ маълумотларига кўра, йил давомида мавжуд иссиқлик таъминоти объектларини модернизация қилиш ҳамда янги турар жой массивларини иссиқлик билан қамраб олиш доирасида жами 60 та лойиҳа муваффақиятли амалга оширилган.
Мазкур лойиҳалар доирасида 157 километр иссиқлик тармоқлари қурилиб, жами 63 та (айрим ҳудудларда 67 та) замонавий иситиш қозонлари ўрнатилди. Бу эса иссиқлик таъминоти тизимининг барқарорлиги ва самарадорлигини оширишга хизмат қилди.
Аниқроқ айтганда, иссиқлик таъминоти корхоналари тасарруфидаги объектларда 19 та иситиш қозони ва 88,9 км иссиқлик тармоқларида қурилиш ҳамда модернизация ишлари амалга оширилди. Шу билан бирга, “Янги Ўзбекистон” массивларида 48 та иситиш қозони, 68,1 км янги иссиқлик тармоқлари қурилиб, фойдаланишга топширилди.
Амалга оширилган ишлар натижасида 2 минг 853 та кўп квартирали уй ҳамда 293 та ижтимоий соҳа объекти — мактаблар, боғчалар ва соғлиқни сақлаш муассасалари барқарор иссиқлик таъминоти билан таъминланди. Бу эса аҳоли турмуш сифати яхшиланиши, ижтимоий объектлар фаолиятининг узлуксизлигини таъминлашда муҳим омил бўлди.
Шунингдек, энергия тежамкор технологияларни жорий этиш ҳисобидан 754 минг куб метр табиий газ ва 183 минг киловатт-соат электр энергияси тежаб қолинди. Мутахассислар фикрига кўра, бу кўрсаткичлар нафақат иқтисодий самарадорликни, балки атроф-муҳитга чиқариладиган зарарли чиқиндиларнинг камайишига ҳам хизмат қилади.
Умуман олганда, 2025 йилда иссиқлик таъминоти соҳасида амалга оширилган ишлар мамлакатимизда коммунал инфратузилмани модернизация қилиш, энергия самарадорлигини ошириш ҳамда аҳолига кўрсатилаётган хизматлар сифатини янги босқичга олиб чиқиш йўлида муҳим қадам бўлди.
Шаҳноза Маматуропова,
ЎзА
