VI Бутунжаҳон кўчманчилар ўйинларида Ўзбекистон жамоаси нечанчи ўринни эгаллади?
Қирғизистоннинг Иссиқкўл вилоятида поёнига етган VI Бутунжаҳон кўчманчилар ўйинларида мамлакатимиз этноспорт вакиллари 19 та медални қўлга киритди.
Дунёнинг 100 га яқин мамлакатидан 3 минг нафардан зиёд спортчи иштирокида этноспортнинг 43 та тури бўйича ўтказилган баҳсларда Ўзбекистон спорт делегацияси 32 та спорт йўналишида Ватанимиз шарафини ҳимоя қилди.
Мусобақада мамлакатимиз вакиллари мас-рестлинг, самбо, армрестлинг, кураш, белбоғли кураш, баҳодирлар ўйини, улоқ-кўпкари, бел олиш ва учкураш, камондан отиш, от спорти, сумо, ақлий ўйинлар, Ўзбек жанг санъати каби спорт турларида совринли ўринларга даъвогарлик қилди.
Ўзбекистонлик спортчилар миллий спортимиз кураш, шунингдек бир қатор миллий якка кураш турларида, самбо, маст-рестлинг, армрестлинг каби йўналишларда совринли ўринларга эгалик қилди.
Шиддатли кечган олти кунлик мусобақалар сарҳисобига кўра, Ўзбекистон спорт делегацияси 4 та олтин, 4 та кумуш, 11 та бронза медали билан умумжамоа ҳисобида 5-ўринни эгаллади.
Медаллар жамғаришда Қозоғистон, Қирғизистон, Россия, Мўғулистон жамоалари умумжамоада етакчиликка эришди.
Т.Рўзиев, ЎзА
