Тәуелсіздік мерекесі қарсаңында 163 жаңа нысан пайдалануға берілді

Президент Шавкат Мирзиёевтің қатысуымен еліміз тәуелсіздігінің 35 жылдығына орай өңірлердегі жаңа нысандарды пайдалануға беру рәсімі өтті.

Іс-шара барысында Мемлекет басшысы өңірлердегі студияларға жиналған қалың жұртшылық өкілдерін және солар арқылы бүкіл Өзбекстан халқын жақындап келе жатқан ұлық мерекемен құттықтады.

Өткен он жылда Өзбекстанда адам қадірін ұлықтауға және халықтың әл-ауқатын арттыруға бағытталған ауқымды реформалар жүзеге асырылды. Кәсіпкерлікке кең жол ашылып, экономиканы әртараптандыру, бәсекеге қабілетті өнеркәсіп салаларын қалыптастыру, шалғай аудандар мен ауылдардың инфрақұрылымын жақсарту бағытында үлкен жұмыстар атқарылды. Білім, медицина және мәдениет салаларына да көңіл бөлу жаңа деңгейге көтерілді.

— Кейінгі он жыл еліміздің тарихында жаңа жаңғыру дәуірі — Үшінші Ренессанстың іргетасын қалау кезеңі ретінде мәңгілікке таңбаланды, — деді Президент.

Осы кезеңде ел экономикасының көлемі 2,5 еседен астам өсті. Экономика салаларына 160 миллиард доллар шетелдік инвестиция тартылып, жалпы құны 76 миллиард доллар болатын 2 мың 163 ірі өнеркәсіптік жоба іске қосылды. Соның нәтижесінде 6 миллионға жуық адам тұрақты жұмыспен қамтылды.

Бүгінде елімізде әлемнің жетекші компаниялары, ірі инвесторлар мен халықаралық қаржы институттарының қатысуымен көптеген жобалар жүзеге асырылуда. Инвестиция көлемінің артуымен бірге өнеркәсіптің құрылымы да түбегейлі өзгеріп келеді.

— Біз шикізат экспорттайтын елден оны терең өңдеу тізбегі негізінде дайын өнімді әлемдік нарыққа шығаратын экономикаға көшіп жатырмыз. Ең маңыздысы, жаңа кәсіпорындармен бірге заманауи технологиялар, жаңа мамандықтар және жоғары білікті жұмыс орындары да пайда болуда, — деді Мемлекет басшысы.

Тек биылдың өзінде құны 1,7 миллиард доллар болатын 56 ірі заманауи өнеркәсіптік және сервистік нысан іске қосылып, 8,8 мың жоғары табысты жұмыс орны ашылды.

Сонымен қатар бюджеттен бөлінген 46 триллион сум қаржы есебінен 385 мектеп, 113 балабақша, 81 аурухана, 7,5 мың шақырым жол, 3,2 мың шақырым ауызсу және кәріз желілері салынды, жөнделді және қайта жаңғыртылды.

Бүгінгі рәсімде еліміздің барлық өңірінде жалпы құны 50 триллион сумға жуық 72 ірі өнеркәсіптік және сервистік жоба мен 91 әлеуметтік нысан пайдалануға берілді. Олардың ашылуы Тәуелсіздік мерекесіне лайықты тарту болды.

Жаңа жобалардың арқасында 15 мың жұмыс орны құрылады. Сонымен бірге олардың есебінен бюджетке жыл сайын қосымша 1 триллион сум түсім түседі.

Инвестициялық жобалар энергетика, ауыл шаруашылығы және азық-түлік өнеркәсібі, металлургия, автомобиль жасау, электротехника, құрылыс материалдарын өндіру, тау-кен өндірісі, тоқыма және жеңіл өнеркәсіп сияқты маңызды бағыттарды қамтыды.

Атап айтқанда, Сырдария облысында қуаты 1 573 мегаватт электр энергиясын өндіретін нысан, Қарақалпақстан Республикасында қуаты 200 мегаватт жел электр станциясы және 100 мегаватт энергия сақтау жүйесі іске қосылды. Науаи облысындағы жаңа энергетикалық жобалар жылына 657 миллион киловатт-сағат электр энергиясын өндіреді.

Бұл жобалардың қатарында елдің экспорттық әлеуетін айтарлықтай арттыратын өндіріс орындары да бар. Әндіжан, Наманган және Жызақ облыстарында іске қосылған тоқыма, трикотаж және кілем өнімдерін өндіретін кәсіпорындар миллиондаған доллар көлемінде экспортты қамтамасыз етеді. Самарқанд және Ташкент облыстарында салынған жаңа металлургиялық кәсіпорындар да өнеркәсіптік кооперацияны кеңейтіп, импортты алмастыруға мүмкіндік береді.

Мемлекет басшысы бүгінгі жобаларды тек инвестиция мен экспорт көрсеткіштері арқылы бағалау дұрыс болмайтынын атап өтті. Жаңа оқу жылы қарсаңында әлеуметтік салада да көптеген заманауи нысан пайдалануға берілуде. Олардың қатарында 36 балабақша, 43 мектеп, 7 жоғары оқу орны және 3 аурухана бар.

Солардың бірі — Жаңа Ташкент аумағында әлемдік стандарттарға сай 10 гектар жерде бой көтерген Жаңа Өзбекстан университетінің заманауи кешені. Мұнда 7 мың студенттің білім алуына жағдай жасалған.

Жоғары оқу орнында Гарвард университетімен бірлесіп Ректорлар мектебінің жұмысы жолға қойылды. Оксфорд университетімен бірлесіп мемлекеттік қызметшілердің біліктілігін арттыруға арналған «Білім хабы» құрылады. Ал 1 қазаннан бастап Жасанды интеллект институты жұмысын бастайды.

Сонымен қатар аумағы 30 мың шаршы метр болатын бес қабатты жаңа Ұлттық кітапхана ең заманауи техникамен жабдықталған. Ол бір мезетте 1,5 мың оқырманға қызмет көрсете алады. Мұнда 28-ден астам оқу бөлмесі мен зал, әртүрлі сыйымдылықтағы конференция залдары ұйымдастырылып, 200 мыңнан астам кітап қоры жинақталған.

Қаршы қаласында құны 400 миллиард сум болатын Экономика және педагогика университетінің заманауи ғимараттары мен нысандары салынды. Мұнда 3 мың студент білім алады, ал 700 тұрғын тұрақты табыс әкелетін жұмыспен қамтылады.

Ферғана облысындағы жаңа заманауи медициналық мекемеде жылына 60 мың науқасты емдеуге және 30 мың әйелді скринингтен өткізуге мүмкіндік жасалды.

Мемлекет басшысы жаңа нысандарды салуға атсалысқан инвесторлар мен кәсіпкерлердің еңбегін жоғары бағалады.

— Сіздер салып жатқан әрбір инвестиция Өзбекстанның болашағының іргетасын нығайтады. Сіздер ашып жатқан әрбір жұмыс орны отбасылардың әл-ауқатын арттыруға қызмет етеді. Сіздер өндіретін әрбір өнім еліміздің экономикалық әлеуетін жаңа деңгейге көтереді. Ал экспортқа шығаратын әрбір тауар Өзбекстанның әлемдік нарықтағы бәсекеге қабілеттілігін арттырады, — деді Президентіміз.

Бұл жобаларды жүзеге асыруға елеулі үлес қосқан құрылысшыларға, инженерлер мен жобалаушыларға, кәсіпкерлер мен инвесторларға алғыс білдірілді.

Бұдан кейін Мемлекет басшысы символдық түймені басты және 72 ірі инвестициялық жоба мен 91 әлеуметтік нысанды пайдалануға берілді.