Трамп Зеленскийни урушни тугатишни истамаётганликда айблади (+видео)
АҚШ Президенти Дональд Трамп Владимир Зеленскийни яна кескин танқид қилиб, Россия билан урушни тугатишни истамаётганликда айблади. Шунингдек, у РФ етакчиси Владимир Путин ва Хитой раҳбари Си Цзиньпин иштирокида уч томонлама учрашув ўтказилиши мумкинлигини айтди. Бу ҳақда ВВС хабар берган.
Трампнинг янги баёноти АҚШ ва Украина муносабати кескин совиган бир пайтда янгради. Журналистларнинг Россия – Украина муносабатига оид саволига жавоб берар экан, у Зеленскийдан норозилигини билдирди:
– Зеленский масалани ҳал қилиши керак эди. Агар у гапимга қулоқ солганида, аллақачон келишувга эришган бўларди.
Трампнинг фикрича, Украина номидан музокарани бошқа биров олиб бориши вақти келган. Айниқса, Путин билан телефон орқали суҳбатлашгандан кейин Трампнинг Зеленский билан муносабати кескин ёмонлашди. Шундан сўнг Трамп Россияга дизель ёнилғисини жаҳон бозорига етказиб бериш имконини берадиган келишувга эришилганини ҳам маълум қилди.
Америка нашрлари ёзишича, РФ раҳбари Трамп ва Си Цзиньпин билан учрашувни 18-19 ноябрь кунлари Хитойда бўлиб ўтадиган Осиё-Тинч океани иқтисодий ҳамкорлиги форуми доирасида ташкил этиш таклифини берган.
АҚШ, Хитой ва Россия раҳбарлари иштирокида Украина масаласи муҳокама қилинадиган саммит ҳақидаги хабарларга Украина ташқи ишлар вазири Андрей Сибига ҳам муносабат билдириб, Киев иштирокисиз мамлакат тақдирини муҳокама қилиш мумкин эмаслигини таъкидлади.
«Украина, АҚШ ва Россия раҳбарлари ўртасидаги уч томонлама учрашув урушни тезроқ тугатишга ёрдам бериши мумкин», — деб ёзди Сибига ижтимоий тармоқда.
«Россия, Хитой ва АҚШ раҳбарлари ўртасидаги уч томонлама учрашув эса тескари натижа беради: Путинни урушни давом эттиришга рағбатлантиради», — дея қўшимча қилди у.
“The Washington Post” газетаси қайд этишича, АҚШ ва Хитой Россиянинг саммит ўтказиш таклифини қабул қиладими-йўқми, ҳали аниқ эмас.
Нашр таъкидлашича, Пекин Европа Иттифоқининг эҳтимолий муносабатини ҳам ҳисобга олиши керак. ЕИ Украинани қўллаб-қувватлаётган асосий кучлардан бири ва Хитойнинг энг муҳим савдо ҳамкорларидан ҳисобланади.
Россия ва Украина ўртасида кенг кўламли уруш бошлангандан бери Хитой бетараф, тинчликка тезроқ эришиш тарафдори эканини билдириб келмоқда. Бинобарин, Пекин Ғарб давлатларининг Россияга қарши санкцияларига қўшилмай, РФ товарлари, жумладан энергетика маҳсулотларини сотиб олишда давом этяпти.
Кенжа Бекжонов, Анвархўжа Аҳмедов (видео), ЎзА
