Трамп ва Зеленский мулоқоти НАТО саммитининг энг муҳим воқеасига айланди
Американинг “The National Interest” нашри Украина президенти Владимир Зеленскийни Анқарадаги НАТО саммитининг асосий ғолиби деб атади. Мақолада АҚШ ва Эрон ўртасидаги кескинлашиб бораётган можаро фонида энг муҳим сиёсий натижага айнан Киев эришганлиги таъкидланган.
– Саммитнинг ҳақиқий ғолиби Украина етакчиси Зеленский бўлди, десак адашмаймиз, сабаби у Трампни Украинага “Patriot” ҳаво мудофааси тизимларини ишлаб чиқариш учун лицензиялаш ҳуқуқини беришга кўндирди, -дейилади мақолада.
Бир кун олдин расмий маросимлардан “изоляция қилинган” деб тахмин қилинган Зеленский Иттифоқ раҳбарлари билан бир қатор икки томонлама учрашувлар ўтказди ва Туркия президенти Режеп Таййип Эрдоған ва НАТО бош котиби Марк Рутте билан ишчи кечки таомланишда иштирок этди.
Нашрнинг ёзишича, Трампнинг қарори Вашингтоннинг Европа иттифоқчилари билан давом этаётган келишмовчиликларга қарамай, Украина мудофаасини қўллаб-қувватлашга бўлган чуқурроқ садоқатини намойиш этади.
Мақолада НАТО саммитининг асосий сиёсий натижаси АҚШнинг Яқин Шарқдаги ҳаракатлари эмас, балки Украинани қўллаб-қувватлашнинг кучайиши бўлганлиги хулоса қилинган.
Яна бир натижа НАТО мамлакатлари жорий йилда қурол-яроғ етказиб бериш, Киевни қўллаб-қувватлашнинг бошқа шакллари учун тахминан 70 миллиард евро ажратишга келишиб олингани, дейилмоқда хабарларда. Шунингдек, йиғинда қўшма қурол ишлаб чиқариш дастурини кенгайтириш ҳам кўриб чиқилган.
“Reuters” хабарига кўра, ГФР канцлери Фридрих Мерц Берлин Украина учун Америка ишлаб чиқарувчиларидан қўшимча “Patriot” тизимларини сотиб олишни молиялаштиришга тайёрлигини тасдиқлаган.
Яна бир нуфузли нашр – “Financial Times” ҳам Трампнинг НАТО саммитида Украинага нисбатан муносабатини кутилмаганда ўзгартирганига эътибор қаратди.
АҚШ президенти Дональд Трамп Анқарада бўлиб ўтган НАТО саммити давомида кутилмаганда Украинага нисбатан янада ижобийроқ позицияни эгаллади ва бу Европа иттифоқчилари орасида эҳтиёткорлик билан некбинликни уйғотди, деб ёзди “Financial Times” газетаси.
Нашрнинг қайд этишича, Трамп нафақат Украина президенти Зеленский билан илиқ суҳбатлар ўтказган, балки Киевга Америка “Patriot” ҳаво мудофааси тизимларини ишлаб чиқариш учун лицензия беришга тайёрлигини ҳам эълон қилган. НАТО бу Вашингтоннинг Россияга нисбатан қаттиқроқ ёндашувини кўрсатиши мумкин деб ҳисоблайди.
Трамп бир қатор Европа иттифоқчиларини танқид қилган бўлсада, саммит иштирокчиларининг сўзларига кўра, ёпиқ эшиклар ортида у Киевга ёрдам беришни давом эттиришни қўллаб-қувватлаган. Шунингдек, у Россия президенти Владимир Путин билан суҳбатлашиш ниятида эканлигини ва Москванинг низони тугатиш шартлари ўзгараётганига ишонишини айтган.
С.Раҳимов, ЎзА
