Трамп “The New York Times” нашрини айблади
АҚШ Президенти Дональд Трамп "The New York Times" нашрини Майамида жойлашган "Trump National Doral" курорти суратини рақамли усулда қайта ишлаб, атай хароб ва қаровсиз аҳволда кўрсатишга уринишда айблади.
Етакчи таъкидлашича, газета эълон қилган сурат ҳақиқатга тўғри келмайди ва бу хатти-ҳаракат дунё етакчилари олдида унинг бренди обрўсига путур етказишга қаратилган.
Америка раҳбари курорт таркибидаги машҳур “Cadillac Championship” мусобақасига мезбонлик қилувчи “Blue Monster” гольф майдони дунёдаги энг сара ва мураккаб спорт мажмуаларидан бири эканини эслатди.
Ўз баёнотида Трамп нашрни доим нохолис ва сохта ахборот тарқатишда айблаб, ишончсизлик сабаб "The New York Times" ўқувчилари сони кескин камайиб кетаётганига урғу берди. Шунингдек, журналистлар Питер Бейкер ва Мэгги Хаберманни фактни текширмай, сохта хабар тайёрлашда айблади.
Президент бундай ҳолатлар йиллар давомида такрорланаётганини қўшимча қилиб, “тез орада газета фаолияти тугаши ва бу воқеа Америка учун буюк кун бўлиши”га ишонч билдирди.
Ф.Яхшибоева, ЎзА
