Трамп Рим папасини танқид қилди (+видео)
АҚШ президенти Дональд Трамп Рим папасини тинчликка чақириқларидан сўнг кескин танқид қилди, деб хабар берди DW нашри.
АҚШ етакчисининг бу баёноти Папанинг бутун дунёда тинчликка чақирган чиқишларидан кейин янгради.
Рим папаси Лев XIV 11 апрель куни ўтказилган диний маросимда дунё етакчиларини урушдан воз кечиб, музокаралар йўлини танлашга чақирган эди. У ўз чақириғида “қурбонларга олиб келувчи қарорлар қабул қилинадиган стол атрофида эмас, музокара столи атрофида ўтириш керак”лигини таъкидлади.
Шунингдек, у аввалги чиқишларида ҳам қурол тутиб турган томонларни уни қўйишга ва можароларни мулоқот орқали ҳал қилишга чақирган эди.
Бу чақириқларга жавобан Трамп ижтимоий тармоқда Рим папасини қаттиқ танқид қилди ва унинг айрим позицияларига норозилик билдирди.
Трампнинг фикрича, Папа айрим халқаро масалаларда нотўғри ёндашувни қўллаб-қувватламоқда. У “Эроннинг ядро қуролига эга бўлишига бефарқ қарайдиган, АҚШнинг Венесуэлага нисбатан сиёсатини танқид қиладиган папанинг менга кераги йўқ”, - деган. Шу билан бирга, у ўзини танқид қилишга Рим папасининг ҳаққи йўқлигини таъкидлаб, “мен халқ томонидан сайланганман ва ўз вазифамни бажаряпман”, - деб ўз фикрини маъқуллаган.
Трамп яна бир баҳсли фикрни ҳам илгари сурди. Унинг айтишича, Рим папаси Лев XIV америкалик бўлгани учунгина бу диний лавозимга сайланган. “Агар мен Оқ уйда бўлмаганимда, у ҳам Ватиканда бўлмасди”- деб, у ўзининг сиёсий таъсирини юқори баҳолаган.
Шу билан бирга, Трамп Рим папасини “сиёсат билан эмас, ўз диний вазифалари билан шуғулланишга” чақирди.
Маълумотларга кўра, бу зиддият аввалроқ бошланган. Рим папаси Лев XIV ўз чиқишларидан бирида “кучга асосланган дипломатия”дан хавотир билдирган ва бу баёнот АҚШ маъмурияти томонидан танқидий қабул қилинган.
Лев XIV тарихдаги Рим папаси бўлган биринчи америкалик ҳисобланади. Унинг тинчлик, мулоқот ва урушга қарши позицияси халқаро майдонда катта эътиборга сабаб бўлмоқда. Шу билан бирга, бу қарашлар айрим сиёсий етакчилар, жумладан Дональд Трамп билан очиқ зиддиятга ҳам олиб келмоқда.
<iframe width="650" height="420" src="https://www.youtube.com/embed/_7SsUG6EaFM" title="Tramp Rim papasini tanqid qildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Искандар Исматов, ЎзА
