Трамп Эрон билан сулҳни номаълум муддатга узайтирди (+видео)
АҚШ президенти Дональд Трамп Эрон билан тузилган вақтинчалик сулҳни номаълум муддатга узайтирди, деб хабар берди Euronews.
Трампнинг сўзларига кўра, бу қарор Покистон илтимоси билан қабул қилинган. Шу билан бирга, АҚШ томони Ҳурмуз бўғози блокадасини давом эттирмоқчи. Эрон эса бу таклифни рад этди ва Вашингтонни янги ҳужумга тайёргарлик кўриш учун вақтдан ютмоқчи, деб айблади.
Трампнинг айтишича, сулҳ Эрон ўз тинчлик шартларини тақдим этмагунча амал қилади. У Эрон ҳукуматидаги келишмовчиликлар ва Покистон раҳбарлари — Асим Мунир ҳамда Шаҳбоз Шарифнинг мурожаати сабаб шу қарорга келган. Аслида сулҳ 22 апрелда тугаши керак эди.
Эрон эса бу узайтиришни тан олмади. Мамлакат парламенти раҳбарининг маслаҳатчиси Меҳди Муҳаммадий Трампнинг қарорини “мантиқсиз” эканини айтди. Унинг фикрича, мағлуб томон шарт қўя олмайди, портларни тўсиб қўйиш эса бомба ёғдиришдан фарқ қилмайди ва унга ҳарбий жавоб бериш керак. Шунингдек, у бу узайтиришни АҚШ томонидан кутилмаган ҳужум учун вақтдан ютиш деб баҳолади.
Эрон ташқи ишлар вазири Аббос Арағчи эса АҚШни сулҳ шартларини бузганликда айблади. Унинг айтишича, Эрон портларини қамал қилиш, бу уруш ҳаракати ҳисобланади. Савдо кемасига ҳужум қилиш ва экипажни гаровга олиш эсаянада оғир қоида бузарликдир.
Шунга қарамай, бир кун олдин Трамп анча қаттиқ баёнот берган эди. У ҳатто ҳаводан зарба беришни “энг яхши йўл” деб ҳисоблашини айтган ва АҚШ армияси бунга тайёр эканини таъкидлаган.
Эрон ҳам, агар келишув бўлмаса, ҳарбий ҳаракатларни қайта бошлашга тайёрлигини билдирган. Покистон раҳбарлари иккала томонни музокараларнинг иккинчи босқичига кўндиришга ҳаракат қилган эди. Лекин, Исломободда ўтиши режалаштирилган бу учрашувнинг бўлиши гумон остида, чунки АҚШ вице-президенти Жей Ди Вэнс Покистонга сафарини бекор қилди. Оқ уй эса кейинги маълумотлар алоҳида берилишини айтди.
Уруш атрофидаги ноаниқлик, тинчликни ўрнатиш ҳаракатлари ва Ҳурмуз бўғозининг ёпилиши жаҳон бозорлари ва нефть нархларига салбий таъсир кўрсатди. АҚШ эса Эронни нефть нархлари бўйича глобал инқироз келтириб чиқараётганликда айблаяпти. Эрон эса бу йўл АҚШ, Исроил ва уларнинг иттифоқчиларидан ташқари барча учун очиқлигини билдирмоқда.
<iframe width="650" height="420" src="https://www.youtube.com/embed/ftXHGHhHFEM" title="Tramp Eron bilan sulhni noma’lum muddatga uzaytirdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА
