Тошкент вилояти жамоаси “Шунқорлар” мусобақасининг ғолиби
Ёшларни юксак ҳарбий-ватанпарварлик руҳида тарбиялаш, Қуролли Кучлар сафида хизмат қилишга қизиқишини ошириб бориш ҳамда уларни руҳан ва жисмонан чиниқтириш мақсадида “Чирчиқ” дала ўқув майдонида “Ёшлар ойлиги” доирасида Ўзбекистон Республикаси мудофаасига кўмаклашувчи “Ватанпарвар” ташкилоти Марказий кенгаши раиси кубоги учун “Шунқорлар” ҳарбий-спорт ўйинларининг республика босқичи ўтказилди.
“Шунқорлар” ҳарбий-спорт ўйинларининг финал босқичида Қорақалпоғистон Республикаси, Тошкент шаҳри ва вилоятларнинг 17-22 ёшли 140 нафар навқирон авлод вакилларидан ташкил топган 14 та жамоа учта гуруҳдан иборат машқларда ўз маҳоратларини намойиш этди.
“Ҳарбий-ватанпарварлик блоки”, “Саф қўшиғи” ва “Биз – бир жамоамиз!” кўрик-танловларида, “Ҳарбий-амалий кўпкураш блоки”да жамоалар пневматик қуролдан ўқ отиш, ўқув гранатасини узоқликка улоқтириш ва ҳарбийлаштирилган эстафета йўналишида ўзаро рақобатлашди.
Шиддатли ва муросасиз кечган “Шунқорлар” ҳарбий-спорт ўйинларининг республика босқичида Тошкент вилояти жамоасининг қўли баланд келиб, Ўзбекистон Республикаси мудофаасига кўмаклашувчи “Ватанпарвар” ташкилоти Марказий кенгаши раисининг кубогини қўлга киритди.
Иккинчи ўрин Навоий вилояти, 3-ўрин эса Андижон вилояти жамоаларига насиб этди. Фахрли ўринларни қўлга киритган жамоалар “Ватанпарвар” ташкилоти, Ёшлар ишлари агентлиги ва Ёшлар иттифоқи томонидан дипломлар ва қимматбаҳо совғалар билан тақдирланди.
Мазкур ҳарбий-спорт ўйинлари доирасида ўтказилган “Раҳбар ва ёшлар” учрашувида “Ватанпарвар” ташкилоти Марказий кенгаши раиси Ҳусан Ботиров ёшларнинг турли касб-ҳунарларни эгаллашлари ҳамда спортнинг техник ва амалий турлари билан шуғулланишлари учун давлатимиз томонидан зарур шароитлар яратилганини таъкидлади.
Т.Рўзиев, ЎзА
