Тошкент шаҳар соғлиқни сақлаш бошқармаси ижтимоий тармоқларда тарқалаётган хабарларга муносабат билдирди
Ижтимоий тармоқларда Тошкент шаҳар перинатал марказида беш ойлик (муддатидан олдин) туғилган чақалоқни, ота-онасининг қатъий қаршилигига қарамай, патологик-анатомик ёриш режалаштирилаётгани ҳақида хабарлар тарқалди.
Тошкент шаҳар соғлиқни сақлаш бошқармаси ушбу ҳолат юзасидан қуйидагилар маълум қилди:
“Республика ихтисослаштирилган она ва бола саломатлиги илмий-амалий тиббиёт маркази Тошкент шаҳар филиалига 2026 йил 28 сентябрь куни Яшнобод туманида истиқомат қилувчи, 1999 йилда туғилган ҳомиладор аёл О.С. мурожаат қилган.
Унга “Ҳомиладорлик – 3, 23–24-ҳафта, туғуруқ – 2. ААА (1 та ҳомила тушган). Марказий жойлашган йўлдошнинг муддатидан олдин кўчиши” ташхиси қўйилган. Шошилинч равишда ультратовуш текшируви ўтказилиб, йўлдошнинг муддатидан олдин кўчиши ва ҳомила дистресси аниқланган.
Қайд этилган ташхисни инобатга олган ҳолда, аёл шошилинч равишда жарроҳлик амалиётига олинган.
Юқори технологик жарроҳлик амалиёти ўтказилиши натижасида чуқур етилмаган, интранатал даврда нобуд бўлган, вазни 670 грамм бўлган ўғил бола туғилган. Неонатологлар томонидан чақалоққа реанимацион чорaлар кўрилган, бироқ кўрсатилган тиббий ёрдамга қарамасдан, чақалоқ нобуд бўлган.
Соғлиқни сақлаш вазирлигининг 2019- йил 22 февралдаги 3138-сон буйруғи билан тасдиқланган “Патологоанатомик текширувлар ўтказиш тартиби”га мувофиқ, барча перинатал ўлим ҳолатлари тўлиқ патологоанатомик текширувдан ўтказилиши белгиланган.
Шу билан бирга, Соғлиқни сақлаш вазирининг 2025 йил 23 июндаги 180-сон буйруғи билан тасдиқланган “Аутопсия (вскрытие) ўтказиш бўйича миллий клиник протокол”нинг 90-банди “и” кичик бандига мувофиқ, 500 грамм ва ундан юқори вазнда ўлик туғилган болалар ҳолатида патологоанатомик ёришни бекор қилишга йўл қўйилмайди.
Шунингдек, мазкур протоколнинг 110-111-бандларида ўлик туғилган болаларни патологоанатомик ёриш, тўқима ва аъзоларини тўлиқ гистологик текширувдан ўтказиш ҳамда текширув натижаларини патологоанатомик текширув баённомасида акс эттириш тартиби белгиланган.
Юқоридагилардан келиб чиқиб, ҳомила ўлими сабабларини аниқлаш, йўлдошнинг муддатидан олдин кўчиши билан боғлиқ патологик ўзгаришларни баҳолаш, шунингдек, суд-тиббий экспертизаси доирасида холис ва тўлиқ хулоса шакллантириш мақсадида ҳомила мурдасини патологоанатомик ёриш ҳамда зарур гистологик текширувлардан ўтказиш лозим.
Шу муносабат билан, мазкур ҳолатда патологоанатомик ёриш масаласи амалдаги миллий клиник протокол талабларига мувофиқ ҳал этилиши зарур”, – дейилади расмий муносабатда.
М.Қосимова, ЎзА
