Tibbiy jihozlar sifatini baholashda malakali mutaxassislar safi kengaymoqda
Bugun tibbiyotda qo‘llanilayotgan har bir buyumning sifati va xavfsizligi inson salomatligi bilan bevosita bog‘liq. Shu bois tibbiy jihozlarni ishlab chiqarish, ularning sifatini baholash va bozorga chiqarish jarayonlarida zamonaviy talablar hamda xalqaro standartlarga amal qilish tobora muhim ahamiyat kasb etmoqda.
O‘zbekistonda ham tibbiy jihozlar xavfsizligini ta’minlash, ishlab chiqarish jarayonlarini xalqaro mezonlarga uyg‘unlashtirish va ushbu yo‘nalishda malakali mutaxassislar salohiyatini oshirishga alohida e’tibor qaratilmoqda. Sog‘liqni saqlash vazirligi huzuridagi Farmatsevtika mahsulotlari xavfsizligi davlat markazida amalga oshirilayotgan ishlar ana shu jarayonning amaliy ko‘rinishlaridan biridir.
Markaz mutaxassislari muvofiqlikni baholash bo‘yicha maxsus o‘quv kurslarini muvaffaqiyatli tamomlab, belgilangan tartibda attestatsiyadan o‘tdi. Ularning tegishli guvohnomalarga ega bo‘lishi va muvofiqlikni baholash huquqiga ega mutaxassislarning yagona davlat reyestriga kiritilishi sohada professional baholash tizimini yanada mustahkamlashga xizmat qiladi.
Shu bilan birga, Markazda xorijiy mutaxassislar ishtirokida “ISO 13485:2016 standartidan tibbiy jihozlar bozorini tartibga solish maqsadida foydalanish” mavzusida maxsus o‘quv kursi ham tashkil etildi. Kurs yakunida xodimlar xalqaro standartlar bo‘yicha sertifikatlarga ega bo‘ldi. Ya’ni, gap faqat navbatdagi malaka oshirish haqida emas — gap tibbiy jihozlar sifatini xalqaro mezonlar asosida baholay oladigan mutaxassislar salohiyatini shakllantirish haqida bormoqda.
Mazkur jarayonning ahamiyati, ayniqsa, kelgusi yillarda yanada yaqqol namoyon bo‘ladi. Prezidentimizning 2025-yil 19-avgustdagi tegishli farmoniga muvofiq, 2027-yil 1-iyuldan boshlab tibbiy jihozlar ishlab chiquvchilari uchun O‘zMSt ISO 13485:2025 milliy standartiga muvofiqlik sertifikati majburiy talab etiladi.
Ushbu talabning joriy etilishi tibbiy jihozlar ishlab chiquvchilaridan sifat menejmenti tizimlarini yangi bosqichga olib chiqishni talab etadi. Bunda xalqaro standartlarni chuqur biladigan, ishlab chiqarish jarayonlarini xolis va professional baholay oladigan mutaxassislarning o‘rni alohida ahamiyat kasb etadi. Shu ma’noda, bugun markazda amalga oshirilayotgan kadrlar tayyorlash va malaka oshirish ishlari kelajakdagi talablar uchun zarur professional bazani shakllantirmoqda.
Zero, ISO 13485 talablari faqat hujjatlar yoki sertifikatlar bilan cheklanmaydi. U tibbiy jihozlarni ishlab chiqarish jarayonida sifatni tizimli ravishda boshqarish, ehtimoliy xavflarni oldindan aniqlash va mahsulot xavfsizligini ta’minlashga qaratilgan yondashuvni nazarda tutadi. Yakunda esa bu talablarning barchasi bitta muhim maqsadga — aholi uchun xavfsiz va sifatli tibbiy mahsulotlar mavjudligini ta’minlashga xizmat qiladi.
Markazda bu yo‘nalishdagi ishlar izchil davom ettirilmoqda. Malakali va xalqaro standartlar bo‘yicha tayyorgarlikka ega mutaxassislar safining kengayishi O‘zbekistonda tibbiy jihozlar bozorini tartibga solish va muvofiqlikni baholash tizimini takomillashtirish, mahalliy ishlab chiquvchilarning xalqaro talablarga moslashuvini qo‘llab-quvvatlash hamda eng muhimi, inson salomatligi va xavfsizligini ta’minlashga qaratilgan muhim amaliy qadamlardan biridir.
Mohigul Qosimova, O‘zA
