Ташкентте «Al Jazeera Media Week» халықаралық медиа апталығы аяқталды
Ташкент қаласында медиа саласы өкілдері үшін жылдың маңызды оқиғаларының бірі болған «Al Jazeera Media Week» халықаралық медиа апталығының салтанатты жабылу рәсімі өтті.
Өзбекстан Ұлттық телерадио компаниясы мен «Al Jazeera Media Network» бірлесіп ұйымдастырған бұл ауқымды іс-шара Өзбекстан мен Қатар арасындағы достық, өзара сенім және тиімді ынтымақтастықтың медиа саласындағы нақты көрінісіне айналды.
Бір апта бойы қатысушылар қазіргі медиа саласындағы өзекті үрдістер – цифрландыру, жасанды интеллект, жаңа ақпараттық форматтар мен мультимедиа технологиялары бойынша халықаралық тәжірибемен танысты. Оқу бағдарламасы бес негізгі бағытты қамтыды. Олар – Mobile Journalism, Artificial Intelligence, Digital Media, Designing and Editing Visuals және General Media Skills.
Медиа апталығының маңызды ерекшеліктерінің бірі – шараға тек Ұлттық телерадио компаниясының қызметкерлері ғана емес, республикада жұмыс істейтін «Дунё» ақпарат агенттігінің, «Renaissance TV», «ZO‘R TV», «MY5», «Seimli» сияқты жетекші жекеменшік телеарналардың өкілдері мен Өзбекстан журналистика және бұқаралық коммуникациялар университетінің дарынды студенттері де қатысты.
Жүзге жуық журналист, медиа маманы мен жас қатысқан қарқынды оқу сабақтарын «Al Jazeera» компаниясының тәжірибелі мамандары жүргізді. Апталық қорытындысында курс қатысушыларына халықаралық деңгейдегі сертификаттар табысталды.
Салтанатты жабылу рәсімінде Өзбекстанда сөз және баспасөз бостандығын қамтамасыз ету, бұқаралық ақпарат құралдары қызметкерлерінің кәсіби шеберлігі мен әлеуетін арттыру мемлекеттік саясаттың маңызды бағыттарының бірі екені атап өтілді. Сонымен қатар қазіргі медиа ортаның талаптарына сай келетін, халықаралық тәжірибе мен инновациялық тәсілдерді терең меңгерген білікті мамандар даярлау маңызды міндеттердің бірі екені айтылды.
«Al Jazeera» телеарнасының кәсіби мамандары өткізген тренингтер қатысушыларға заманауи журналистика мен медиа технологияларын тәжірибе жүзінде үйренуге мүмкіндік берген өзіндік шеберлік мектебіне айналды. Сабақтар барысында ақпарат ұсынудың озық форматтары, көрнекі контент әзірлеу, мобильді журналистика және медиа саласында жасанды интеллектіні тиімді пайдалану бойынша жаңа білім мен дағдылар берілді.
Айта кету керек, «Al Jazeera Media Week» кәсіби біліктілікті арттырумен қатар, жаңа идеялармен бөлісуге, мамандар арасында пікір алмасуға және халықаралық тәжірибе жинақтауға арналған маңызды алаң қызметін де атқарды. Апталық аясында ұсынылған инновациялық тәсілдер мен заманауи медиа шешімдер Өзбекстанның ақпараттық кеңістігін одан әрі дамытуға ықпал етеді деп күтілуде.
Сонымен бірге медиа саласындағы ұзақ мерзімді ынтымақтастықтың құқықтық негізін нығайту мақсатында «Al Jazeera Media Institute» мен Өзбекстан Ұлттық телерадио компаниясы арасында өзара түсіністік және ынтымақтастық туралы меморандумға қол қойылды.
Бұл құжат алдағы уақытта бірлескен оқу бағдарламаларын ұйымдастыруға, сарапшылар алмасуын жолға қоюға, мамандардың біліктілігін арттыруға және ірі медиа әрі контент жобаларын бірлесіп жүзеге асыруға жаңа мүмкіндіктер ашады.
Осылайша, «Al Jazeera Media Week» халықаралық медиа апталығы заманауи журналистика, инновациялық технологиялар мен халықаралық ынтымақтастықты ұштастырған маңызды кәсіби алаң ретіндегі өз жұмысын аяқтады.
