Суперлига: 5-тур старт олмоқда

ФИФА кунлари муносабати билан юзага келган қарийб икки ҳафталик танаффусдан сўнг Ўзбекистон Суперлигаси баҳслари яна давом этади. Бугун, 2 апрель куни миллий чемпионатимизда 5-тур учрашувларига старт берилади.

Турнинг бугунги дастуридан икки қизиқарли баҳс ўрин олган. Унда “Сўғдиёна” ўз майдонида “Қўқон-1912”ни қабул қилади (18:00). Шунингдек, Тошкент дербисида “Бунёдкор” ҳамда “Локомотив” жамоалари ўзаро куч синашади (19:00).

5-турнинг қолган ўйинлари 3–4 апрель кунлари бўлиб ўтади. Жумладан, 3 апрель куни “Хоразм” — “Динамо” (18:00), “Навбаҳор” — “Машъал” (19:00), “Насаф” — “Андижон” (20:15) учрашувлари ўтказилади. 4 апрель дастуридан эса “Пахтакор” — ОКМК (17:00), “Қизилқум” — “Нефтчи” (18:00) ва “Сурхон” — “Бухоро” (19:15) беллашувлари жой олган.

Маълумот учун, 4-тур якунларига кўра, “Нефтчи” 12 очко билан мусобақа жадвалида якка пешқадам бўлиб турибди. “Бухоро” 10 очко билан иккинчи, “Пахтакор” эса 9 очко билан учинчи поғонадан жой олган.

Шунингдек, 7 очкодан жамғарган “Локомотив”, “Насаф” ва “Бунёдкор” клублари тўплар нисбатига кўра 4–6-ўринларни банд этган. 6 очкодан жамғарган “Қизилқум”, “Навбаҳор” ва “Андижон” кейинги поғоналарда бормоқда.

Жадвалнинг 10–14-ўринларида “Хоразм”, ОКМК, “Сурхон”, “Динамо” ва “Қўқон-1912” жамоалари 4 очкодан тўплаган ҳолда жойлашган. “Сўғдиёна” ҳисобида 1 очко бўлиб, 15-ўринни эгаллаб турибди. Ҳозиргача очко жамғармаган “Машъал” эса 16-поғонада қолмоқда.

Жавоҳир Тошхўжаев,

ЎзА