Шахмат: Ўзбекистон жамоаси “Central and North Asian Chess Championship 2026” ғолиби

Қирғизистоннинг Иссиқкўл шаҳрида поёнига етган “Central and North Asian Chess Championship 2026” мусобақасида Ўзбекистон терма жамоаси аъзолари 11 та медаллар шодасини қўлга киритди.

Шахмат бўйича 2026 йилги Марказий ва Шимолий Осиё чемпионатининг стандарт йўналишида Ўзбекистон терма жамоаси жамоавий ҳисобда 4 та олтин, 5 та кумуш ва 2 та бронза медалларга эгалик қилган ҳолда пешқадамликка эришган бўлса, 4 та олтин, 2 та кумуш, 1 та бронза медаль жамғарган Қозоғистон жамоаси 2-ўринни эгаллади, 3 та олтин, 2 та кумуш, 1 та бронза медалли бўлган Қирғизистон жамоаси кучли учликка якун ясади.

Маҳоратли шахматчиларимиздан Сайфуддин Эркинбоев(U10), Иброҳим Жуманазаров(U12), Малика Норқулова(U12), Зилола Актамова(U18) ўз ёш тоифаларида “Central and North Asian Chess Championship 2026” чемпионлик шоҳсупасига кўтарилди.

Шунингдек, Комилжон Муртазаев(U8), Фазлиддин Фарҳодов(U10), Акбар Мустафақулов(U12), Шавкатжон Абдуҳоликов(U14), Малика Жўмаева(U16) кумуш, Ҳондамир Элмирзаев(U20) ва Нигина Ҳудойбердиева(U10) бронза медаллари билан тақдирланди.

Т. Рўзиев, ЎзА