Serxio Aguero Xulian Alvaresni himoya qildi
Bu Xulianga nisbatan adolatsizlik.
Argentinalik sobiq futbolchi Serxio Aguero hamyurti Xulian Alvaresni qo‘llab-quvvatladi.
26 yoshli hujumchi «Barselona»ga o‘tishni istamoqda va klubni tark etish niyatini ochiqchasiga bildirgan. Biroq «Atletiko» Alvaresni kataloniyaliklarga sotishni istamayapti. La Liganing «Vilyarreal»ga qarshi so‘nggi uchrashuvida «matraschilar» muxlislari argentinalik futbolchini hushtakbozlik bilan kuzatib qo‘ydi.
«Men buni tushunmayapman. Xulian ketishni istayapti, klub esa uni qo‘yib yubormayapti. Keyin esa muxlislar uni hushtakbozlik qilmoqda. Ular undan nimani kutishmoqda? U allaqachon qaror qabul qilgan.
«Atletiko» Alvares bilan muzokara stoliga o‘tirib, vaziyatdan maqbul yechim topishga harakat qilishi kerak. Vaziyatni yanada murakkablashtirish emas. Hozir futbolchi atrofida salbiy muhit yaratilmoqda va uni aybdor qilib ko‘rsatishmoqda. Bu Xulianga nisbatan adolatsizlik.
Vaziyat «Atletiko» uni «Barselona» o‘rniga boshqa klubga ketishga majbur qilish uchun hamma narsani qilayotgandek ko‘rinmoqda. Agar haqiqatan ham shunday bo‘lsa, bu xato. Bunday yondashuv boshqa futbolchilarning ham «Atletiko»ga bo‘lgan ishonchiga putur yetkazishi mumkin», — deya Aguero so‘zlarini keltiradi Topskills Sports UK.
Xulian Alvaresni o‘z safiga qo‘shib olishga «Arsenal» ham qiziqish bildirmoqda.
