Сергей Ростовцев Словакияда 3 та медални қўлга киритди
Ўзбекистон миллий терма жамоаси аъзоси Сергей Ростовцев Словакияда ўтказилган «GP Slovak Cycling Federation» халқаро турнирида муваффақиятли иштирок этиб, олтин, кумуш ва бронза медалларни қўлга киритди.
«Scratch» пойгасида Сергей Ростовцев 75 очко жамғариб, барча рақибларини ортда қолдирди ва мусобақанинг олтин медалига сазовор бўлди. Иккинчи ва учинчи ўринларни туркиялик Рамазан Йилмаз ҳамда Мустафа Таракчилар эгаллади.
Ҳамюртимиз «Elimination» дастурида ҳам совриндорлар сафидан жой олди. У 68 очко билан финишга етиб келиб, иккинчи ўринни қайд этди. Бу баҳсда биринчи ўрин поляк спортчиси Даниэль Станишевскийга насиб этган бўлса, австриялик Рафаэль Кокас кучли учликни якунлади. Велоспортчимиз чиқиб кетиш пойгасида ҳам муносиб натижа қайд этиб, бронза медални қўлга киритди.
Шу тариқа, Сергей Ростовцев «GP Slovak Cycling Federation» турнирида бир йўла учта медалга сазовор бўлиб, Ўзбекистон миллий терма жамоаси шарафини халқаро майдонда муносиб ҳимоя қилди
Жавоҳир Тошхўжаев, ЎзА
