Путин тинчликка эришиш имконияти борлигини айтди (+видео)
Россия президенти Владимир Путин Украинада тинчликка дипломатик йўл билан эришиш имконияти бор, деб ҳисоблайди. Аммо унинг фикрича, урушни тугатиш масаласида асосий келишувни Россия ва Украина тўғридан-тўғри ўзлари ҳал қилиши керак. Бошқа давлатлар эса бу жараённи қўллаб-қувватлаши ва ёрдам бериши лозим. Бу ҳақда DW нашри хабар берди.
Путин, шунингдек, Россия ва Украина махсус хизматлари ўртасида алоқа сақланиб қолаётганини айтди. Аммо, бу алоқалар тинчликка эришишга қанчалик ёрдам бериши мумкинлигини аниқ айта олмаслигини билдирди.
У Украина томонидан Қора денгиздаги транспорт кемаларига қилинган ҳужумлар ва Киевнинг Россия ҳаво ҳудудини хавфли деб атаганини ҳам тилга олди. Путиннинг фикрича, бундай ҳолатлар Россия ва Украина ўртасида тўғридан-тўғри тинчлик музокараларини ўтказишни қийинлаштирмоқда.
Шу куни Украина президенти Володимир Зеленский ҳам Россия билан музокараларни қайта бошлаш эҳтимоли ҳақида гапирди. Унинг айтишича, яқин вақт ичида АҚШ вакиллари Киев ва Москвага бориши мумкин. Бу учрашувларда урушни тугатиш ва эҳтимолий тинчлик келишуви муҳокама қилинади.
«АҚШ президенти вакиллари Киевга келишини кутяпмиз. Улардан тасдиқ ҳам олдик: учрашув Москвада ҳам, Киевда ҳам бўлади», — деди Зеленский. У Киев АҚШ вакиллари билан доимий алоқада эканини қўшимча қилди.
Россия ва Украина ўртасида тинчлик музокараларини қайта бошлаш масаласи август ойи охирида Москвага АҚШ Марказий разведка бошқармаси раҳбари Жон Рэтклиффнинг яширин ташрифидан кейин яна муҳокама қилина бошлади. Трамп маъмурияти вакили Россия томонига АҚШ, Россия ва Украина президентлари иштирокида уч томонлама учрашув ўтказиш ғоясини таклиф қилган. Бу учрашувда урушни дипломатик йўл билан тугатиш масаласи муҳокама қилиниши керак эди.
Аммо бу хабарлар тарқалгандан кейин Дональд Трамп яқин вақтда бундай уч томонлама саммит ўтказиш режаси йўқлигини айтди.
Аммо, Трампнинг сўзларига кўра, Путин бундай учрашувга рози бўлса АҚШ бу учрашувни ташкил қилиши мумкин.
Трампнинг фикрича, Украинада тинчлик ўрнатишга асосий тўсиқлардан бири — Путин ва Зеленский ўртасидаги шахсий келишмовчилик. Трамп аввал урушни «бир сутка ичида тугатаман» деб ваъда қилган эди. Аммо унинг айтишича, Украинадаги вазият у ўйлагандан анча мураккаб бўлиб чиқди.
<iframe width="560" height="315" src="https://www.youtube.com/embed/Mp-4r_XKPX4?si=b_KG9NEr5yzfuaVR" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
