"Президент олимпиадаси": Енгил атлетика мусобақаларида Қашқадарё вилояти етакчи

Ўзбекистон давлат жисмоний тарбия ва спорт университети марказий ўйингоҳида “Президент олимпиадаси” спорт мусобақаларининг енгил атлетика баҳслари якунланди.

Мусобақаларда мамлакатимизнинг барча ҳудудларидан 272 нафар спортчи югуриш, спортча юриш, сакраш, улоқтириш ва эстафета йўналишларида ўзаро куч синашди.

Икки кунлик баҳслар сарҳисобига кўра, Қашқадарё вилояти жамоаси 4 та олтин, 5 та кумуш, 2 та бронза, жами 11 та медаль билан умумжамоада 1-ўринни эгаллаган бўлса, 4 та олтин, 3 та кумуш, 1 та бронза медали жамғарган Хоразм вилояти вакиллари 2-ўринни, 3 та олтин, 1 та кумуш, 2 та бронза медалини жамғарган навоийлик ёш енгил атлетикачилар кучли учликни банд этди.

Шунингдек, Бухоро ва Сирдарё вилояти жамоалари 3 тадан олтин, Наманган ва Тошкент шаҳри енгил атлетикачилари 2 тадан олтин медалга эгалик қилди.

Эслатиб ўтамиз, “Президент олимпиадаси”нинг енгил атлетика мусобақаларида умумий ҳисобда 24 та медаллар жамланмаси ўз эгаларига топширилди.

Т.Рўзиев,

ЎзА