Пойтахтимизда халқаро саноат форуми иш бошлади (+видео)
7-9 апрель кунлари “Ўзэкспомарказ”да Халқаро саноат форуми иш бошлади. Бир майдонда тоғ-кон, металга ишлов бериш ва кимё саноати, шунингдек, хавфсизлик, транспорт, махсус техникалар ва асбоб ускуналар намойиш қилинмоқда.
Қўшма экспозицияларда Австрия, Буюк Британия, Германия, Италия, Хитой, Россия ва қўшни давлатларнинг дунёга танилган 200 дан ортиқ компаниялари, ишлаб чиқарувчилар ва нуфузли брендлар ўзларининг энг сўнгги ишланмаларини тақдим этмоқдалар. Шу ўринда айтиш керакки кўргазмада Хитой компанияларининг иштироки юқори бўлди. Улар томонидан ноёб ускуналар, қолип тизимлари ва автоматлаштирилган технологияларнинг кўплаб турлари намойиш қилинди.
Кўргазманинг тоғ-кон саноати қисмида соҳа учун замонавий технологиялар ва ускуналар, қазилма бойликларини излаб топиш учун мақбул ечимлар, бурғулаш техникаси, тунел қуриш ва кон ишларига мўлжалланган транспорт воситалари кенг ассортиментда намойиш қилинди. Металлургия ва металга ишлов бериш, дастгоҳсозлик, машинасозлик, пайвандлаш техникалари учун ҳам алоҳида павильон ажратилиб, бу ерда ўлчаш ускуналарининг энг янги намуналари, соҳа учун бутловчи қисмлар, эритиш ва иситиш тизимлари ва бошқа саноат компонентлари ҳақида билиб олиш ҳамда биринчи қўлдан харид қилиш имкони яратилди. Албатта ҳар бир бизнеснинг тараққиёти аввало замонавий ускуналар билан бевосита боғлиқдир. Ташкилотчиларининг таъкидлашича ушбу кўргазма минтақада халқ хўжалигининг турли тармоқлари учун зарур бўлган ускуналарни харид қилишга ёки маҳаллий корхоналаримизнинг йирик бизнес вакилларига таништиришга қулай бир платформадир. Зеро, унда халқаро экспертларнинг тақдимотлари, юзма-юз учрашувлар ва янги лойиҳаларнинг намойиши бўлиб ўтади.
Тадбир иштирокчилари учун бу ерда дунёнинг ва маҳаллий етакчи компанияларнинг энг сўнгги технологиялари ва ускуналари билан яқиндан танишиш, фойдали шартномалар тузиш ва ўз бизнесларини янги форматда йўлга қўйишлари учун етарлича шарт-шароит яратилган.
<iframe width="640" height="420" src="https://www.youtube.com/embed/qTzzz6JL79U" title="Poytaxtimizda xalqaro sanoat forumi ish boshladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов, Ёқубжон Мелибоев, Улуғбек Тўхтаев (видео), ЎзА
