Покистоннинг Германиядаги янги элчиси Берлинга етиб борди

“Associated Press of Pakistan” (APP) агентлиги маълум қилишича, Покистон Ислом Республикасининг Германиядаги янги тайинланган Фавқулодда ва мухтор элчиси Салмон Шариф ўз дипломатик миссиясини бажариш учун Берлинга етиб борди.

Аэропортда уни Федерал ташқи ишлар вазирлиги мутасаддилари, Покистон элчихонаси раҳбари ўринбосари ва дипломатик корпус ходимлари кутиб олган. Берлинга жўнаб кетишдан аввал Салмон Шариф Исломободда Покистон Бош вазири ўринбосари - ташқи ишлар вазири Муҳаммад Исҳоқ Дар билан учрашган. Суҳбат чоғида ТИВ раҳбари Исломобод ва Берлин ўртасидаги алоқаларни мустаҳкамлаш, айниқса савдо-сотиқ, иқтисодий ва инвестициявий ҳамкорликни кенгайтириш зарурлигини уқтирган.

Бундан ташқари элчихона олдига ГФРдаги покистонлик диаспора вакиллари билан яқиндан ишлаш, уларнинг ҳуқуқи ва манфаатини ҳимоя қилиш ҳамда сифатли консуллик хизмати кўрсатиш устувор вазифа сифатида қўйилган.

Ф.Яхшибоева, ЎзА