Петер Мадьяр: Президент истеъфога чиқиши керак (+видео)
Венгрия президенти Тамаш Шуйок Петер Мадьярга янги ҳукуматни шакллантиришни топширди. Мадьяр эса президентни лавозимидан кетишга чақирди, деб хабар берди Euronews.
Парламент сайловида ғалаба қозонган “Тиса” партияси раҳбари Петер Мадьяр президент Тамаш Шуйокдан ҳукумат тузиш бўйича расмий ваколат олди. Бу ҳақда у президент қароргоҳида бўлиб ўтган учрашувдан кейин маълум қилди. Улар парламентнинг инаугурация йиғилиши қачон ва қандай тартибда ўтиши бўйича келишиб олди.
Мадьярнинг айтишича, парламентнинг биринчи йиғилиши тахминан 6–7 май кунлари бўлиши мумкин. Венгрия президенти ва Петер Мадьяр техник масалалар бўйича тўлиқ келишувга эришган. Шундан сўнг Мадьяр президентни истеъфога чиқишга чақирган.
Унинг сўзларига кўра, “венгр халқи фақат ҳукуматни эмас, балки бутун тизимни ўзгартириш учун овоз берган”. Мадьяр президентни қонун устуворлигини ҳимоя қилишга муносиб эмас, деб ҳисоблайди ва у демократик тартибни ҳимоя қилишда фаол бўлиши керак эди, деб таъкидлади. Шунинг учун у президентдан демократияни сақлаб қолиш учун ўз хоҳиши билан кетишни сўради. Агар у ихтиёрий равишда кетмаса, Мадьяр уни ва бошқа амалдорларни конституцион ваколат асосида лавозимдан четлатишини айтди.
Мадьярнинг айтишича, Шуйок бу гапларга ўйлаб кўришини билдирган. У Венгрияда қонун устуворлигини сақлаш ва мамлакатнинг халқаро обрўсини ҳимоя қилишни хоҳлашини айтган.
Шунингдек, Мадьяр президентдан лавозимни тарк этаётган бош вазир Виктор Орбан билан музокараларда воситачи бўлишни сўраган. Бу музокаралар давомида эски ҳукумат янги ҳукуматга мамлакатдаги вазият ҳақида тўлиқ маълумот бериши, муҳим масалаларни келишиб олиши ва зарур қарорлар қабул қилиши керак. Айниқса, энергия хавфсизлиги каби долзарб масалаларга эътибор қаратилган.
Венгрия конституциясига кўра, президент парламент томонидан сайланади ва унинг ваколатлари асосан рамзий ҳисобланади, лекин у қонунларга риоя этилишини назорат қилишда ҳам муҳим роль ўйнайди.
Аввалги президентлар ва амалдаги Тамаш Шуйок Виктор Орбан ҳукуматини қўллаб-қувватлаб келган. Ғалаба нутқида ҳам Мадьяр уни истеъфога чақирган.
<iframe width="640" height="420" src="https://www.youtube.com/embed/STynKaLHOc4" title="Nafosat festivalini mehr bilan ekkan gullarim bilan kutib olaman — Umida Nurboyeva" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>К.Бекжонов, ЎзА
