Пешкуда зиё таратаётган тараққиёт чироқлари
Бугун Янги Ўзбекистонда амалга оширилаётган ислоҳотларнинг ҳақиқий мезони – инсон манфаати, халқ фаровонлиги ва ҳудудларнинг барқарор тараққиётидир. Президентимиз ташаббуси билан ҳаётга татбиқ этилаётган давлат дастурлари нафақат шаҳарлар, балки энг чекка қишлоқ ва маҳаллалар қиёфасини ҳам тубдан ўзгартирмоқда. Айниқса, замонавий электр энергетикаси инфратузилмасини яратиш, аҳолини узлуксиз ва сифатли электр энергияси билан таъминлаш масаласи давлат сиёсатининг энг устувор йўналишларидан бири сифатида белгилаб олингани бугун ҳар бир ҳудудда амалий натижаларини намоён этмоқда.
Бухоро вилоятининг энг чекка ҳудудларидан бири – Пешку туманида олиб борилаётган ишлар ана шу эзгу сиёсатнинг ёрқин ифодасидир. Электр энергияси – бу шунчаки ёруғлик эмас. У ишлаб чиқариш қуввати, тадбиркорлик ривожи, таълим ва тиббиёт муассасалари фаолияти, энг муҳими, ҳар бир хонадоннинг осойишта ва фаровон ҳаёти демакдир. Шу боис бугун электр тармоқларини янгилашга қаратилган ҳар бир қурилиш объекти эртанги тараққиёт учун қўйилаётган мустаҳкам пойдевор сифатида баҳоланмоқда.
2026 йил давлат дастурлари доирасида Пешку туман электр тармоқлари корхонаси томонидан кенг кўламли қурилиш ва модернизация ишлари амалга оширилмоқда. Режага мувофиқ, туманда жами 11 та объектда 19 та замонавий трансформатор пункти, 30,9 километр узунликдаги 10/0,4 киловольтли электр узатиш тармоқлари ҳамда 629 дона темир-бетон таянч қурилиши белгиланган.
Эътиборлиси, бу режалар қоғозда қолиб кетмаяпти. Қисқа вақт ичида 15 та трансформатор пункти ишга туширилди, 7,3 километр янги электр тармоғи тортилди, 582 дона мустаҳкам темир-бетон таянчлар ўрнатилди. Бу эса режалаштирилган ишлар изчил ва юқори суръатларда давом этаётганидан далолат беради. Қолган объектларда ҳам қурилиш-монтаж ишлари жадал олиб борилмоқда.
Энг муҳими, амалга оширилаётган ишлар аҳолининг реал эҳтиёжларидан келиб чиққан ҳолда манзилли ташкил этилмоқда. Жумладан, “Янги Ўзбекистон қиёфасидаги маҳалла” дастури доирасида 5 та, “Оғир маҳаллаларни ривожлантириш” дастури доирасида 4 та ҳамда “Оғир туманлар” дастури асосида яна 6 та трансформатор пункти ўрнатилди. Бу эса давлат дастурлари энг аввало одамларни қийнаб келган муаммоларни ҳал этишга хизмат қилаётганининг амалий исботидир.
Бугун Пешкуда қад ростлаётган ҳар бир трансформатор, тортилаётган ҳар бир электр тармоғи ва ўрнатилаётган ҳар бир таянч ортида минглаб инсонларнинг орзу-умидлари мужассам. Бу ишлар туфайли электр таъминотининг барқарорлиги таъминланади, кучланиш билан боғлиқ муаммолар камаяди, тадбиркорлик субъектлари учун янги имкониятлар яратилади, янги уй-жойлар ва ижтимоий объектлар ишончли электр манбаига эга бўлади.
Президентимиз томонидан илгари сурилаётган “Инсон қадри учун” тамойили бугун ана шундай эзгу ишларда ўзининг амалий ифодасини топмоқда. Чунки тараққиёт аввало мустаҳкам инфратузилмадан, замонавий муҳандислик тармоқларидан бошланади. Электр таъминоти яхшиланган ҳудудда иқтисодий фаоллик ортади, инвестициялар жалб этилади, янги ишлаб чиқариш қувватлари яратилади ва энг муҳими, одамларнинг ҳаёт сифати юксалади.
Пешкуда амалга оширилаётган бунёдкорлик ишлари шунчаки рақамлар ёки ҳисобот эмас. Бу — Янги Ўзбекистон тараққиётининг ҳаётий ифодаси, мамлакатимизда олиб борилаётган халқпарвар сиёсатнинг амалий натижаси, келажакка қаратилган мустаҳкам инвестициядир. Бугун барпо этилаётган электр инфратузилмаси эртанги тараққиётга хизмат қилади, ҳар бир хонадонга ёруғлик, ҳар бир оилага ишонч ва фаровон келажак бағишлайди.
Зариф Комилов, ЎзА мухбири
